Publiká riba 18 Yüni 2020
Willemstad – Relashoná ku petishonnan pa pèrmit di trabou, Sektor di Labor di Ministerio di Desaroyo Sosial, Labor & Bienestar ta informá pueblo ku entrante 22 yüni 2020, Sektor di Labor ta reanudá servisio relashoná ku entrega di notifikashon di vakatura konforme artíkulo 5 insiso 5 bou di c di Ordenansa di labor pa estranhero (P.B. 2001, no. 82), primordialmente petishon di ekstenshon di pèrmitnan di trabou eksistente.
Manera ta konosí, dia 28 aprel 2020, Minister a dekretá pa medio di dekreto number 2020/013133, ku pèrmitnan di trabou di kua nan balides a kaduká entre 30 mart 2020 & 30 yüli 2020, ta bálido te ku 30 yüli 2020.
Ku otro palabra e pèrmit aki pa loke ta nan fecha di vensementu a keda prolongá outomátikamente te ku 30 di yüli 2020.
Notifikashonnan di vakaturanan hasí den kuadro di e ekstenshon pa un pèrmit di trabou di kua nan balides a kaduká entre 30 mart 2020 & 30 yüli 2020 ta bálido te ku 30 di yüli 2020.
Na e momentunan aki lo evaluá kasonan spesífiko relashoná ku kompanianan òf persona ku ke entregá un petishon pa un promé pèrmit (pèrmit nobo) di trabou teniendo kuenta ku e stipulashonnan den dekreto nashonal publiká P.B. 2020, nr. 19 ku a keda adaptá pa medio di e dekreto nashonal publiká P.B. 2020, nr. 64.
Tambe Sektor di Labor ta informá ku entrante 22 yüni 2020 e lo reanudá su servisio relashoná ku registrashon di kompania.
