Publiká riba 13 Òktober 2021
Orguyoso di desoroyonan positivo pero importante pa henter komunidat prepará
Willemstad – Riba 13 di òktober mundialmente ta selebrá dia internashonal di redukshon di riesgo di desaster (international day for disaster risk reduction). Direktorado di Kontrol di Riesgo i Maneho pa Kalamidat (DRR) di Gobièrnu di Kòrsou, riba e dia aki ta wak bèk riba desaroyonan positivo di último añanan, ku Gobièrnu di Kòrsou a tuma den mitigashon i preparashon pa kontrolá krísis i desaster. For di aña 2014 a instituí DRR pa enfoká riba halsa e preparashon i konsientisashon bou di pueblo di Kòrsou, huntu ku organisashonnan di Gobièrnu pero tambe bou di tur profeshonalnan ku ta traha den e area di krísis i desaster.
Pa komunidat no ta semper mésora visíbel kiko tur DRR, huntu ku e Organisashon pa kombatí krisis i desaster (RbO) i e diferente organisashon profeshonal, ta hasi diariamente, pa por mitigá i prepará pa kualke krisis ku por bati na nos porta. Pero, por ehèmpel, den e krisis aktual okashoná dor di e pandemia di COVID-19, ta ya kaba pa 579 dia konsekutivo, diariamente ta duna asistensia i kordiná e diferente prosesonan pa Gobièrnu por sigui manehá e krisis. Tur e esfuersonan aki ta visibel den dos reportahe, kaminda DRR a kompilá tur e trabounan di e diferente organisashonnan ku ta traha duru pa Kòrsou por sali for di situashon difísil ku nos ta aden. Mientrastantu DRR tambe a desaroyá un ‘Landsverordening Rampenbestrijding i Crisisbeheersing’ ku resientemente a pasa parlamento.
Tur e logronan den e desaroyonan, for di dia ku DRR a kuminsá na 2014, ta importante pa Gobièrnu por ta mas mihó posibel prepará pa kualke krisis òf kalamidat ku por asotá Kòrsou. Pero e desaroyonan por ta solamente efektivo si komunidat tambe hasi tur esfuerso pa prepará i ta informá di tur posibel menasa ku por resultá den un krísis. Ta pruebá sientifikamente ku hende ku ta prepará, ta sali mas mihó for di kualke situashon desastroso. Esaki ta e mensahe ku e diferente miembronan di Organisashon pa kombatí krisis i desaster di Kòrsou ta trese den un produkshon oudiovisual kòrtiku, ku Gobièrnu a publiká via di su kanalnan digital. Mas informashon tokante krísis i kalamidat i kon pa prepará, ta alkansabel via www.kalamidat.cw.
