Publiká riba 05 Òktober 2021
WILLEMSTAD – Resientemente tabatin entrega di sertifikado na 10 kliente di prizòn ku a sigui e proyekto “E Arte di un Barbero”.
E kurso di pelamentu akí tabatin un durashon di 8 siman, kaminda e klientenan por a siña e fishi di barbero bou di guia di señor Rignald Cecilia di Smoothline Barbershop.
Durante e kurso a para ketu na e parti di teoria di pelamentu, e téknikanan di kon ta hasi uso di e mashin di pela i sekuensia di uso di e mashin. Tambe a para ketu na e parti di higiena, kual ta hopi importante, i aktitut di trabou di un barbero.
Den un ambiente hopi ameno por a mira e satisfakshon di e kursistanan i e nesesidat pa SDKK sigui ofresé kursonan asina akí pa mas kliente. Tambe a lanta e idea pa habri un barberia den prizòn kaminda klientenan i personal di SDKK por bai pela.
Gerensia di SDKK ta sumamente kontentu ku resultado di e proyekto akí, debí ku por a duna un oportunidat na e klientenan akí pa forma nan mes den e fishi di pelamentu.
