Publiká riba 13 Novèmber 2019
Willemstad– CHATA en kolaborashon ku Ministerio di Desaroyo Ekonómiko (MEO) i Ministerio di Desaroyo Sosial, Labor i Bienestar (SOAW) ta anunsiá inisio di e proyekto “Kla Pa Turismo”. E proyekto aki ta forma parti di Strategia di Kresementu pa Kòrsou i ta duna oportunidat pa 300 persona keda entrená i prepará pa un trabou sigurá den sektor di turismo. Personanan ku ta interesá pa forma parti di e proyekto i traha den sektor di turismo por akudí djasabra 23 di novèmber 2019 di 9 or di mainta pa 5 or di atardi na Marnix College Cas Cora. Di e 300 personanan ku keda skohé, 45 lo kuminsá na yanüari 2020.
Turismo i sektor di hospitalidat aktualmente ta kresiendo ku rapides i ku esaki tambe e nesesidat di hendenan kapas i dispuesto pa traha. Teniendo kuenta ku e nesesidat aki i e aspekto sosial di hendenan ku ta den nesesidat di trabou, CHATA ta kuminsá ku ehekushon di e proyekto “Kla pa Turismo” komo parti di un koperashon estrecho entre sektor públiko i privá huntu ku Ministerio di Desaroyo Ekonomiko (MEO), Ministerio di Desaroyo Sosial, Labor i Bienestar (SOAW) i tambe mundu empresarial.
E proyekto lo ta enfoká riba adultonan ku ta motivá pa traha den sektor di hospitalidat i ku aktualmente no tin un trabou. E kontenido di e programa ku e proyekto aki lo ofresé, ta riba nivel básiko i e sètùp ta derivá for di e sistema di enseñansa di werkend leren. Esaki ta nifiká ku despues di atmishon e partisipantenan lo kuminsá ku un entrenamentu ku lo dura algun siman i lo konsistí di konosementu teorétiko kombiná ku práktika. Aparte di materianan basá riba téknika lo tin tambe materianan general manera idioma, servisio na kliente i lo prepará partisipantenan pa traha huntu komo un tim.
Despues di e promé periodo di mas o ménos 1 luna, partisipantenan lo bai traha kuater dia pa siman komo trahadó alumno bou di guia di un profeshonal den un hotèl òf restorant. Un dia pa siman e alumno ta bini bèk pa evaluashon, guia i lès adishonal. Maestronan ku eksperensia den sektor i ademas abilidatnan didáktiko lo duna e lèsnan i tambe ta enkargá ku guia den koperashon ku empresanan. E periodo di práktika den kompania ta dura máksimo 20 siman i ta keda klousurá ku un èksamen di práktika.
Pa engrandesé un oportunidat genuino pa un trabou despues di e programa, CHATA ta informá ku lo ofresé únikamente estudionan relatá na e nesesidat ku kompanianan den e sektor ta konfrontando. Kla pa Turismo lo ofresé e siguiente programanan di estudio:
Eventualmente tambe lo ofresé estudio di bartènder i ‘housekeeping’.
Atmishon di partisipante ta basá riba motivashon, personalidat i responsabilidat. Profeshonalnan riba tereno laboral di tantu Gobièrnu i sektor priva lo tene kòmbersashonnan di entrada ku kada aplikante i lo determiná ken ta kla pa introdusí i solisitá na un kompania di enseñansa den sektor. Despues di un solisitut positivo, e kompania lo indiká i konfirmá aseptashon di e alumno i e por kuminsá ku e programa. Durante e promé 4 siman di e programa e alumno lo no risibí pago, sinembargo durante e 20 simannan di práktika e alumno lo risibí un salario mínimo i lo tin mesun derecho i debernan ku un trahadó regular.
Djasabra 23 di novèmber próksimo, CHATA ta organisá un dia di inskripshon pa e proyekto “Kla pa Turismo”. Tur persona ku ke bin na remarke pa partisipá por bini na e dia di inskripshon. Inskripshon lo tuma lugá na Marnix College Cas Cora di 9 or’ di Mainta pa 5 or’ di atardi. Tur hende ku ta interesá mester bini ku un kopia di identifikashon bálido i kopia di CV. Dado kaso e persona no tin nashonalidat Hulandes òf Merikano ta hasi un apelashon pa e bini ku un kopia di su pèrmit di trabou. Tur kandidato ku na e momentu aki ta den e trayekto di preparashon di Gobièrnu (steunpunt) di “brede intake” na Feffik lo no mester partisipá na e inskripshon aki mirando ku nan ta inskribí kaba pa e trayekto aki.
Pa mas informashon por bishitá www.klapaturismo.com
