Publiká riba 27 Aprel 2021
Kerido kompatriotanan,
Mas ku un aña pasá a sera nos bunita isla na yabi, komo reakshon riba e flamante pandemia di korona ku a afektá henter mundu. Ta desishon ku a inisiá un periodo di dia, siman- i lunanan di insiguridat i di miedu. Un ratu asina a parse ku kos a kuminsá bai mihó. Awor ta manera nos a bolbe start henteramente di nobo. Pendiente pa ‘Dia di Rei’ yega, nèt ora m’a pensa ku nos lo por a move ku mas libertat, nos a sinti aki na palasio – den e époka kaminda ambiente sa ta masha animá -, un silensio palpabel. Realidat ta ku e vírùs di korona akí ainda no ta kompletamente dominá.
Gobernador di Kòrsou Señora L.A. George-Wout
I sin embargo, aunke e sifranan te ainda ta sigui preokupante i trahadónan den kuido di salú ta trahando hopi ora èkstra, ta parse ku situashon ta bòltu poko poko. Otro dia ei Minister Presidènt a afirmá esaki asertadamente den un konferensia di prensa: ‘nos ta aserkando e punto di ‘inflekshon’, esta e punto kaminda e bakuna ta dominá e vírùs.’
Te ora ta asina leu, ta kuestion di perseveransia. No ta asina ku nos por deskuidá e medidanan ku ta evitá mas kontagio. Importante te ainda ta ku nos ta evitá kontakto i ta sigui tene kuenta ku e otro normanan di seguridat vigente. Sigur e situashon akí ta kontra nos deseo- i nos sintimentunan. Nos gusta ‘brasa’. Pero awor akí, por lo pronto no ta posibel.
Nos no por ignorá realidat. E vírùs ta kobrando un preis masha haltu den nos sosiedat … Mi ta kòrda tur hende ku ta pèrdè un ser kerí pa motibu di korona … Hende ku ta malu dor di e vírùs, o ku ta batayando ku loke e vírùs ta kousa na efekto físiko i mental. Efekto riba hende grandi i hende hóben ku debí na nan limitashonnan sosial ta haña nan ta lidia ku tenshon o soledat … Tur nos empresarionan i tur hende ku a pèrdè trabou i ta kore e riesgo di pèrdè trabou … Mi pensamentunan i mi kurason ta ku boso.
Pero mi ta konvensí ku e situashon ku nos ta aden awor ta yuda nos superá e momentu difísil akí. Kada un di nos individualmente, pero tambe nos pais den su totalidat. ‘Stima bo próhimo manera bo ta stima bo mes’, esaki ta nifiká pa mi: nos un ta kuida otro, nos un ta yuda otro, konsolá otro. Ta nèt loke nos ta mira sosodé awor den nos barionan, kaminda bisiñanan ta yuda otro sea ku nan ta hasi rospondi pa … òf nan ta paga èkstra atenshon na hendenan ku awor ta risibiendo ménos bishita. Nos hendenan ta apoyá otro inkondishonalmente sin importá religion, orígen òf antesedente. Hopi yu di tera ta rekonosé nan mes den e komportashon akí, loke ta pone mi sinti mi orguyoso di e pueblo akí.
Den nos reino tambe nos konosé tradishon kultural ku tin bia ta diferensiá mashá for di otro. Nos historia kolektivo a konosé tantu époka amargo komo tempu di speransa i ekspektativa. Apesar di diferensianan – tin bia grandi – den eksperensia di persepshon ku ta eksistí, nos ta uní den un reino pa mas di dos siglo. Ta masha signifikativo. Sin suavisá e diferensianan di opinion, ta bon pa nos pone tinu na loke ta konektá nos. Tambe denter di reino nos ta kuida i apoyá otro. Ehèmpel tin na kantidat último tempu; desena di trahadó den kuido di salú for di Hulanda a yega Hato na prinsipio di e luna akí pa yuda nan koleganan den CMC, yudansa ku kuminda ku gobièrnu hulandes a pone na disposishon via Krus Kòrá, 65.000 vakuna adishonal ku gobièrnu hulandes a entregá ku urgensia, e yudansa ku Defensa ta ofresé den e programa di vakunashon di nos pueblo i den mantenshon di òrdu; i Aruba ku ta akohé nos pashèntnan pa aliviá e preshon riba nos departamento di kuido intensivo. Na nos turno, nos por a yuda Boneiru, akohiendo nan pashèntnan ora esei tabata nesesario.
Esaki ta un dia ideal pa apresiá i selebrá nos konekshon úniko komo e kuater paisnan di Reino i e tres entidatnan públiko. …Huntu nos ta fuerte.
Meskos ku sa ta e kaso entre hende un ku otro, ekspresá gratitut entre pais un ku otro no semper ta simpel. Ekspresá gratitut por hasi ku un persona por parse vulnerabel pasobra bo ta rekonosé ku bo tin debe di paga na un otro. Tòg ta di importansia ku no solamente entre hende nos ta ekspresá gratitut, sino tambe entre pais un ku otro. No komo signo di debilidat sino komo señal di fortalesa. Mas ku nunka, e muestranan akí di apresio entre persona, pero tambe entre nos rumannan den reino, ta di vital importansia.
Dia 19 di mart hopi di nos a hasi uso di nos derecho demokrátiko di vota. Esei tabata importante. E gobièrnu ku ta bai drenta awor lo tin e responsabilidat pisá pa entre otro gana e ekonomia ku bárbaramente e krísis di korona a suta, riba pia atrobe. Último tempu a mustra ku aki un kooperashon konstruktivo denter di nos reino por kontribuí. Resientemente Sekretario di Estado Knops tambe a deskribí e kooperashon ku e palabra ‘huntu’; ta solamente huntu nos por progresá den reino.
Den liña ku e medidanan vigente, a disidí ku e aña akí, meskos ku aña pasá, lo no por tin e resepshon na okashon di Dia di Aña di Rei, ni – por lo pronto – Weganan di Rei, ni entrega di kondekorashon. Anteriormente m’a transmití e mensahe akí tambe na 32 siudadano di Kòrsou, ku mi por a informá na nòmber di Su Mahestat Willem-Alexander, ku nan lo risibí un kondekorashon real pa nan hopi aña di servisio spesial na komunidat di Kòrsou. Ta mi plaser felisitá un biaha mas e dekoradonan ku nan honorabel distinshon. Mi ta spera e momento yega ku mi por topa no solamente e dekoradonan, sino boso tur atrobe, pa nos brasa otro.
Lo mi ke brinda awor pa salú di nos Mahestat Rei Willem-Alexander i e méritonan di nos dekoradonan. Nos ta selebrá dia di Rei 2021 na kas, na distansia, pero huntu.
Biba Rei!
