Publiká riba 01 Febrüari 2021
Pueblo di Kòrsou,
For di aña pasá mi a bin ta tene boso informá di e proseso pa rekonstruí nos pais di forma sólido i duradero. Esaki ku e mira pa un etapa nobo pa nos pueblo.
Ya pa algun tempu nos ta kanando e trayekto pa ehekutá i realisá e asina yamá “landspakket” – manera a kumbiní ku Hulanda – komo parti di e sosten finansiero ku nos a risibí. E landspakket ta enserá ku lo realisá ahuste i proyektonan ku mester kontribuí na e.o. alsa kalidat di bida di nos pueblo, pero tambe e.o. fortifiká maneho finansiero ekonómiko di nos pais.
Ni e situashon di krísis kousá pa e pandemia, ni kambio di aña no a stroba un delegashon di Ministerio di Asuntunan Interno i di Reino, huntu ku representantenan di nos ministerionan i ekspertonan lokal, pa hasi inventarisashon di trayektonan ku ya tin andando pa asina por aliñeá esakinan ku un plan di aserkamentu. Esaki a sosodé a base di vários reunion ku a tuma lugá entre e ministerionan konserní di ámbos pais, kaminda a logra analisá tur e trayektonan i yega konkretamente na ehekushon.
Awe nos ta asina leu ku ami, huntu ku Sekretario di Estado Sr. Knops, a ratifiká e agènda di ehekushon di e trayektonan di prioridat. Esaki ta nifiká ku for di awe ta bai traha dirigí, pa riba término korto finalisá e plannan di akshon pa kada un di e trayektonan. E trayektonan ta organisá bou di e siguiente temanan: fortifikashon di nos maneho finansiero, nos kobransa di impuesto, nos reforme ekonómiko, nos estado di derecho, nos sektor finansiero-bankario, nos provishon sosial, kuido, i nos enseñansa.
Den e plannan di akshon tin kla definí, e resultadonan ku mester logra na bienestar di nos desaroyo i ki dia esakinan mester ta kla. Den gran mayoria di e trayektonan, tantu Kòrsou komo Hulanda ta karga responsabilidat pa realisá akshonnan konkreto. Alabes nos ta tene otro skèrpi mediante e proseso di monitòr avansenan. Pues nos ta hasié huntu. Mi mester bisa ku te ku awor den e periodo ku ta tras di lomba, e kolaborashon entre nos ministerionan i esnan di Hulanda a kana hopi bon. Tabatin komprenshon mutuo i tambe nos a siña di otro.
Shonnan, primintí ta debe. For di momentu ku nos a drenta den e trayekto akí, mi a indiká na boso ku nos tin un oportunidat úniko pa drenta un etapa nobo pa ku desaroyo di nos pais. Esaki lo mester generá bienestar pa kada un di nos, manera mihó skol pa nos yunan, mehorashon di nos klima di invershon ku ta resultá den mas kupo di trabou, mehorashon di nos sektor di kuido i realisashon di un komunidat seif i sigur. E ta un trayekto di kambio i nos ta konsiente ku kambio ta trese resistensia, pero si di bèrdat nos ke kambia rumbo di nos pais den direkshon di bienestar, nos mester dal e pasonan akí. Anto awor! Huntu, usando tur rekurso tantu den nos mes aparato gubernamental komo for di Hulanda – i si mester aporte di ekspertonan lokal – nos lo realisá e diferente trayektonan. Mi ta hasi un apelashon riba abo pa bo tambe duna di bo parti pa nos ta eksitoso. Gobièrnu lo hasi lo máksimo pa e proseso ta inklusivo i di nos!
Pues, awor nos por dal pasonan konkreto ku ta brinda e oportunidat pa prosperá i logra un bida digno pa nos mes i nos próhimonan den nesesidat. Ban sigui kana huntu e kaminda akí pa rekonstruí nos pais kaminda tur dia di nobo, ku orguyo, por doblá manga di kamisa pa laborá òf hasi negoshi. Ta na ami i abo, ku ta konvensí ku nos pueblo ta meresé lo mihó, pa nos kuminsá awe i no laga pa mañan. Lo tin un plan di akshon kada kuartal, pues e próksimo lo ta den aprel kaminda lo presentá e siguiente sèt di reformanan struktural. Lo mi sigui tene boso informá di e desaroyonan, pasobra éksito di e etapa nobo akí ta huntu nos ta logr’é. Ban p’é!
