Publiká riba 30 Sèptèmber 2020
Na okashon di e apertura, Minister di Enseñansa, Siensia, Kultura i Deporte (ESKD) sr. Eugene Rhuggenaath, i presidente di Plataforma Sklabitut i Herensia di Sklabitut (PSHS) sr. Frank Quirindongo, a hiba palabra.
E ‘Siman di Konmemorashon 225 aña Matansa di Tula’ ta kulminá dia 3 di oktòber. Esaki ta e fecha riba kual e matansa di nos hereo nashonal Tula i su kompañeronan den e lucha pa libertat, a tuma lugá. 3 di òktober ta tambe un fecha importante den e siklo di restourashon. Gobièrnu di Kòrsou a dekretá un siklo di restourashon dia 17 di ougùstùs 2020. Esaki a sosodé durante di e seremonia di konmemorashon di Lucha pa Lbertat na e Parke di Lucha pa Libertat. E siklo di restourashon su meta ta pa kada suidadano komprondé Korsou su historia ku ta konektá na nos pasado. Tambe ta nesesario pa mira aspektonan ku por drecha i hasi esfuerso pa mehorá.
Minister di ESKD huntu ku Presidente di PSHP a para ketu riba e importansia di e dos plakanan konmemorativo ku ta pegá na e muraya di Fort Amsterdam:
1) un plaka konmemorativo blanku na okashon di 25 aña Abolishon di Sklabitut, kaminda a gradisí Rei Willem III, i
2) un plaka konmemorativo pretu ku oro na okashon di 150 aña Abolishon di Sklabitut, kaminda Presidente di Parlamento di Kòrsou Sr. Mike Franco, komo representante demokratiko skohé pa pueblo, a gradesí Tula. Riba e plaka tin skibi: “Danki pa bo lucha pa libertat ku a kondusí finalmente na abolishon di sklabitut i inspirashon pa mas i mas emansipashon”
E echo ku a para ketu i refleha riba e Matansa di Tula i su kompañerona ta mustra ku Kòrsou su outo-determinashon i su outonomia ta importante. Lema di e Siman di Kultura 2020 tabata netamente ‘Nos a komprondé, nos a konektá i nos a kosechá!’. Ta esensial pa kada suidadano sigui reflekshoná riba Kòrsou su historia, ku tin influenshá riba nos kultura.
Durante di e apertura, Presidente di PSHP a trese dilanti ku nan komo plataforma a skibi diferente karta pa Gobièrnu di Reino Hulandes ku e petishon pa rehabilitá nos héroe nashonal Tula. Komo ku Gobièrnu ya a dekretá Tula komo héroe Nashonal na 2010, i a ratifiká esaki na 2017, ta pidi Gobiernu di Reino Hulandes pa rehabilitá Tula for di e kargonan pa kua a konden’é. Gobièrnu ta rekonosé e esfuerso di PSHP pa logra esaki.
Gobièrnu ta hasi un yamada na pueblo pa sigui konektá ku nos historia. Ban hasi mas esfuerso pa nos komprondé nos historia, komprondé nos kultura, i komprondé nos diversidat. Tambe nos mester konektá na nos historia, konektá na Kòrsou su sitionan históriko, i konektá ideanan pa huntu nos por kosechá.
Balornan manera libertat, igualdat i fraternidat ta pilarnan importante pa nos nashon para ariba. Asina nos por kosechá. Kada un suidadano ta duna su aporte na konstrukshon di nos nashon. Kòrsou ta riku na historia. Ban sigui huntu den e periodo di reflekshon kultural aki eksplorando Kòrsou su posibilidatnan, brasa nos herensia, i traha na fortifikashon di e base di nos nashon.
Kòrda sigui MiKultura riba Facebook i Kultura_Kòrsou riba Instagram i usa e ‘hashtag’ nan #kultura2020, #reflekshonkultural2020 i #simandikultura2020 ora bo pone bo arte òf idea kreativo.
** riba e potrètnan athunto por tuma nota di e apertura dilanti di fort Amsterdam kaminda Minister E.Rhuggenaath a hiba palabra.
