Publiká riba 13 Mei 2020
WILLEMSTAD- Den kuadro di e “nòrmal nobo” ku nos pais ta konosiendo a konsekuensia di COVID-19, Ministerio di Desaroyo Ekonómiko (MEO) tambe ta tuma medidanan preventivo pa asina protehá tantu su empleadonan komo tambe un-i-tur ku bishitá ofisinanan di e ministerio.
Teniendo kuenta ku reglanan di distansia sosial i pa evitá aglomerashon ínesesario den ofisinanan di MEO, nos ta anunsiá ku entrante awor i te ku otro aviso lo atendé bishitantenan solamente a base di sita na nan ofisina situá na Pletterijweg 43, Parera.
Asuntu di pèrmitnan ekonómiko ketubai ta keda atendé via di Lokèt di Pèrmit i ta bon pa klientenan tuma nota di orario i servisionan adaptá di parti e Lokèt, pa asina por hasi uso optimal di esaki. Pues e kliente ku mester hasi un petishon nobo, buska su pèrmit òf ta enbuska di informashon general tokante un òf mas di e pèrmitnan aki, lo mester tuma kontakto direktamente ku Lokèt di Pèrmit na 0800-1515 òf 433-3123.
Tur otro kliente i/òf bishitante mester traha un sita pa por bishitá ofisinanan di MEO. Pa hasi esaki un-i-tur por yama libremente na 462-1444 òf tuma kontakto direktamente ku e kolega konserní pa un sita.
Mirando ku durante e temporada aki kisas e liñanan lo por ta okupá na momento di tuma kontakto ku nos ofisina, nos ta pidi bo(so) indulgensia den esaki miéntras nos ta trata na atendé tur persona debidamente.
