Prosedura pa petishon i pago di sèn pa paña di skol (kledinggeld)
Publiká riba 13 Ougùstùs 2021
WILLEMSTAD – Minister di Desaroyo Sosial, Labor i Bienestar, sra. Ruthmilda Larmonie-Cecilia, na nòmber di Gobièrnu di Kòrsou, ta informá ku tur kobradó di ònderstant lo risibí pago di sèn pa paña di skol (kledinggeld) pa aña 2021 den kinsena 17/2021 (fecha di pago ta dia 16 di ougùstùs 2021).
Personanan ku tin un entrada bou di suèldu mínimo por pasa entrante 16 di ougùstùs 2021 na e Kas di Bario konserní pa hasi nan petishon.
Ken por bini na remarke pa sèn pa paña di skol:
- Yu di mayor òf tutor ku ta kobra ònderstant òf tin un entrada bou di suèldu mínimo:
- Yu mester ta inskribí den Registro Sivil di Kòrsou i tambe mayor òf tutor mester ta inskribí;
- Yu di un estranhero ku tin un pèrmit bálido i ta inskribí den Registro Sivil di Kòrsou;
- Yu ku ta kai bou di lei di skol obligatorio i ta bishitá un Skol di Fundeshi, Skol spesial, SBO, HAVO òf VWO supsidiá dor di gobièrnu (edat di 4 pa 18 aña).
Kua dokumentonan mester entregá na momentu di un petishon:
- Sédula òf reibeweis òf pasport bálido di mayor òf tutor òf e persona outorisá ku ta bin hasi petishon;
- Sédula di yu òf papel di òp òf buki di famia;
- Deklarashon ku e yu ta inskribí na skol (schoolverklaring) aña 2021-2022 si e yu ta riba 18 aña;
- Esnan ku tin un entrada bou di suèldu mínimo mester trese e deklarashon di entrada di Inspekshon di Belasten;
- Esnan ku entrada bou di suèldu mínimo i ku tin kuenta koriente di Maduro & Curiel’s Bank òf otro bankonan lokal, mester trese e number di kuenta tambe.
Por entregá petishon pa sèn pa paña di skol (kledinggeld) na Kas di Bario Punda, Kas di Bario Otrobanda, Kas di Bario Sta Maria i Kas di Bario Brievengat.
Último dia pa entregá petishon i hasi keho relashoná ku sèn pa paña di skol ta dia 8 di òktober 2021.
