Publiká riba 01 Febrüari 2021
WILLEMSTAD – Gobièrnu di Kòrsou ta anunsiá komienso di un trayekto pa yega na un emblema nashonal nobo pa Kòrsou. Den e kuadro akí, ta buska profeshonalnan ku riba un base boluntario ke forma parti di e asina yamá ‘Komishon Emblema Nashonal’. Meta di e komishon akí ta pa enkaminá e trayekto pa remplasá nos eskudo nashonal aktual, ku un emblema nashonal nobo. Intenshon ta pa den dos siman di tempu selektá interesadonan ku tin ku bai forma parti di e komishon akí.
Un símbolo nashonal ta di gran balor pa su komunidat. Su meta prinsipal ta pa representá e pais, uni su siudadanonan i krea un sentido di patriotismo i orguyo profundo. E emblema nobo lo mester proyektá nos kultura, prinsipionan, historia, talento i ambishonnan komun di un forma konstruktivo i rekonosibel pa nos siudadanonan. Esaki Konseho di Minister a disidí na desèmber 2020.
E emblema nobo mester bira unu diseñá, desaroyá i skohé ku partisipashon di komunidat. Tur siudadano lo haña oportunidat di entregá nan propio diseño for di kual pa medio di un votashon popular e komishon lo formulá un konseho pa Gobièrnu di Kòrsou.
Rekrutashon di profeshonalnan pa forma e komishon akí ta un di e promé pasonan den e trayekto pa realisá un Emblema Nashonal Nobo den kuadro di konstrukshon di nos nashon. Tur hende ku ta sinti nan mes yamá pa forma parti di e komishon akí por solisitá dor di reakshoná riba e avisonan ku ta keda publiká den diferente medionan di komunikashon i e medionan digital di Gobièrnu di Kòrsou.
Pronto lo sigui mas informashon tokante e trayekto akí.
