Publiká riba 07 Febrüari 2020
E obhetivo prinsipal ta pa e maestro aspirante ta muchu mas mihó prepará pa e realidat den kua e ta bai traha. Banda di e formashon den e Instituto (UoC, IPA i UA), e formashon den práktika lo sosodé bou di guia di un asina yamá “schoolopleider”, esta un entrenadó interno eksperensiá ku lo keda prepará profeshonalmente pa e funshon aki tambe, esaki banda di e asina yama guiado di stazje (werkplekbegeleider) ya eksistente. E kolaborashon entre e instituto di formashon di maestro i tambe e skol, esta kaminda e maestro aspirante lo bai traha finalmente, di e forma aki ta intensivá pa resultá den un kalidat di maestro muchu mas altu. E kolaborashon aki ta garantisá ku e aspirante ta mihó prepará, dor di dominá tantu e konosementu teorétiko komo konosementu di e práktika muchu mas mihó. Eskoho di e skol di práktika pa prepará e maestro aspirante lo keda hasí den deliberashon ku direktivanan di skol i Inspekshon pa garantisá kalidat di e preparashon.
E komité direktivo, konsistiendo di enkargadonan di Enseñansa di Aruba, Boneiru i Kòrsou, sostené pa profeshonalnan di Ministerio OCW Hulanda, tabatin un dia di trabou pa delineá kuadronan básiko i tambe deliberá riba kondishonnan imperativo pa realisá e Kolaborashon aki. Temanan ku a trata durante e seshon aki ta entre otro Kalidat di e kontenido di e preparashon di maestro, Inovashon di e programa i struktura di formashon, Presupuesto i finansa, akreditashon, promoshon i naturalmente análisis di faktibilidat. Ta bon pa informá ku e realisashon di e akshon di inovashon aki lo keda ko-finansiá dor di Gobièrnunan di Aruba, Kòrsou i tambe Hulanda ku un subsidio firme. Gobièrnu di Hulanda a pone un subsidio spesial pa e kolaborashon aki, konsiderando ku preparashon di maestronan na institutonan di tantu Aruba i Kòrsou ta produsí kantidatonan no solamente pa e paisnan aki mes, pero tambe pa BES i tambe Sint Maarten.
Fundamental pues den e proseso aki ta pa forma e Maestro Karibense, ku por operá na nivel haltu den un konteksto multilingwe. Pa esaki partisipashon di institutonan di formashon di maestro, direktivanan di skol, pero tambe vèlt di Enseñansa mes ta imperativo. Desèmber un komishon sentral konsistiendo di representantenan di e institutonan di formashon i direktivanan di skol di e paisnan a profundisá, sensibilisá i diskutí riba e akshon di mehorashon aki i a bini ku proposishonnan ku mester keda tratá ku representashon di vèlt di Enseñansa mes. Na yanüari tabatin promé seshon den kua vèlt di Enseñansa di tantu Aruba, Boneiru komo Kòrsou a partisipá i asina yuda duna kontenido na tantu e profil komo e kuríkulo pa formashon aktualisá di maestro. Mester bisa ku representashon di kada pais tabata di altu nivel i profeshonal, kual a resultá den un kuadro di e kuríkulo ku lo keda ehekutá den e preparashon den práktika.
Na luna di mart lo sigui ku seshonnan di trabou ku e komishon sentral (ku representashon amplio) i e komité direktivo pa kanalisá e preparashon, di moda ku e promé gruponan, den forma “hybride”, por kuminsá na luna di sèptèmber.
—
Sr. Wladimir Kleinmoedig
Direktor di Sektor di Enseñansa & Siensia
Ministerio di Enseñansa, Siensia, Kultura & Deporte
**Riba e foto por tuma nota di e komité: dilanti: Juliska van Rossum (RCN – Bonaire), Jantien Hadders (OCW Hulanda), Mei mei: Justus de Hooge (OCW Hulanda), Nolly Oleana (RCN – Bonaire), Annemarie Proveyer-Groot (Directie Onderwijs Aruba), Patras: Wladimir Kleinmoedig (Sector Onderwijs & Wetenschap, Curacao)
