Publiká riba 29 Mart 2023
Willemstad – Departamento di Reibeweis ta informá ku entrante djaluna, 20 di mart 2023, registrashon a habri pa tur studiante ku ta bai studia den eksterior i ke pasa nan èksamen pa reibeweis promé ku nan biaha.
Tur studiante ku ta bai studia pafó di Kòrsou den e aña eskolar benidero i ke pasa nan èksamen di reibeweis, mester manda nan registrashon via e-mail pa e Departamento di Reibeweis. Di e forma akí, e departamento di Reibeweis por plania mihó i garantisá un bon servisio. Último dia pa registrá i hasi e pago na Departamento di Reibeweis, ta djabièrnè 9 di yüni 2023. Na momento di registrashon, tur studiante interesá mester a kumpli 18 aña kaba.
E e-mail ku studiantenan por usa pa manda nan registrashon ta rijbewijzen.puz@gobiernu.cw. Huntu ku e registrashon mester manda un kopia di identifikashon di e studiante i tambe prueba di su petishon na Stichting Studiefinanciering Curaçao (SSC). Esaki mester indiká ku e ta studiante ku ta bai studia den eksterior e aña di estudio 2023/2024. Studiantenan ku ta bai studia den eksterior, sin aporte di SSC, mester tin un deklarashon di skol aktual.
Pa mas informashon por tuma kontakto via number di telefòn 736-2929 òf manda un mail na rijbewijzen.puz@gobiernu.cw.
