Publiká riba 23 Òktober 2020
WILLEMSTAD- For di luna di aprel 2020 Ministerio di Desaroyo Ekonómiko (MEO) ta enkargá ku implementashon di entre otro sosten finansiero na empresarionan individual ku a hiba pèrdida finansiero komo konsekuensia di e pandemia di COVID-19. Pa medio di e komunikado aki, MEO ta anunsiá ku e periodo pa por apliká pa sosten finansiero na empresarionan individual pa luna di òktober ta habri di djaluna 26 di òktober 4’or di atardi pa djaluna 2 di novèmber 4’or di atardi.
Tur empresario individual ku ya ta den e sistema lo por apliká manera e lunanan anterior pa medio di un link ku nan ta risibí via mail pa por aktualisá e informashonnan di nan empresa. Empresarionan individual ku ta apliká pa promé biaha mester manda un mail na empresario@fondodisosten.org pa indiká esaki. Pa por bini na remarke, e empresa mester ta inskribí na Kámara di Komèrsio promé ku 16 di mart 2020. E empresario mester manda e komprobante di Kámara di Komèrsio di su empresa, huntu ku su number di telefòn na e e-mail ariba menshoná. MEO lo evaluá si e empresario por bini na remarke pa e sosten di luna di òktober.
MEO a konstatá ku tur luna di nobo ta risibí un kantidat supstansial di petishonnan ku a base di e kriterionan no ta bini na remarke pa risibí e sosten finansiero i personanan ku ta trata na burla e sistema dor di apliká mas ku un biaha òf bou di diferente nòmber, lokual ta atrasá e proseso pa por finalisá e petishonnan risibí.
Por último MEO ta informá ku empresarionan individual ku a bai biba den eksterior lo no bini na remarke pa sigui risibí e sosten finansiero. Ta hasi un apelashon na empresarionan ku si ta bini na remarke pa por fabor apliká solamente denter di e periodo di aplikashon.
