Notisia

Un Kurason Bibu pa nos Bandera

WILLEMSTAD – Ministerio di Enseñansa, Siensia, Kultura i Deporte ta informá ku e konmemorashon riba promé di yüli i selebrashon di dos di yüli ta keda selebrá di un forma ofisial ku e lema “Un Kurason Bibu pa nos Bandera”. Gobièrnu no ta pèrmití aglomerashon sin e parti di kontrol preventivo organisatorio. Pa e motibu akí a opta pa esaki sosodé di un forma virtual mas tantu posibel komo ku ainda nos ta den e pandemia di COVID-19. Esaki ta nifiká ku no tin tribuna riba Plasa Brion manera kustumbrá.

Ta pidi tur siudadano pa sigui e konmemorashon i selebrashon via di nan kanal di preferensia òf via di plataformanan sosial di Gobièrnu di Kòrsou. Den kaso ku partisipá aktivamente na un aktividat keda tene kuenta ku e reglanan preventivo pa ku COVID-19. 

Meta di nos lema “Un Kurason Bibu pa nos Bandera” ta pa inspirá pueblo di Kòrsou haña forsa pa lanta bèk despues di e temporada difísil ku Kòrsou a pasa aden for di mart 2020 te ku awe. Ku e lema akí Gobièrnu di Kòrsou ke logra pa e yu di Kòrsou tene nos soñonan i nos metanan bibu pa sigui desaroyá nan pa adelanto di nos mes i nos pais. Nos forsa ta bini for di kada un persona su talentonan. Riba Dia di Emansipashon nos ta reflekshoná riba nos desaroyo i Dia di Bandera ta e dia ku nos ta selebrá nos talento i nos logronan komo Yu di Kòrsou pa tene nos kurason bibu pa sigui ku desaroyo di nos pais!

Programa dia promé di yüli 2021: Dia di Emansipashon

Orario: 17:15 – 20:00

• Yegada di mandatarionan i invitadonan;
• Entrega na Minister Presidènt sr. Pisas  di e rapòrt final  yamá:  “Nos no ke nada mas sino nos libertat”;
• Maestro di Seremonia ta anunsiá entrada di Peloton di Bandera i gruponan hubenil uniformá riba Plasa Brion;
• Himno Di Kòrsou interpretá pa T’Kayla Polonius;
• Komandante di Peloton Wigley Isidora ta aserká Minister di Enseñansa, Siensia, Kultura i Deporte, sr. Sithree van Heydoorn pa pidi pèrmit pa baha Bandera di Kòrsou;
• Seremonia di dobla Bandera di Kòrsou;

• Gabinete Pisas akompañá ta hiba e Bandera Fort Amsterdam i warda esaki. Despues ta sigui ku un aktividat kaminda vários persona prominente ta dialogá i debatá riba e tema di e dianan 1 i 2 di yüli 2021. E Debate “Un Kurason Bibu pa nos Bandera”: Kulminashon di Debatenan ku a tuma lugá den barionan di Kòrsou Gibraltar, Lagun i Koraalspecht;
• Metanan di e Debate “Un Kurason Bibu pa nos Bandera”: ta pa yega na  un definishon komun pa e Yu di Kòrsou, formulá puntonan konkreto ku mester traha riba dje pa krea un identidat kolektivo pa pais, kaminda ta lansa e proyekto “Debate den Bario” ku lo start 9 di yüli.

Programa dia dos di yüli 2021: Selebrashon Dia di Bandera

Orario: 07.00 – 11.00

• Alabansa na enkargo di Universal Voices;
• Entrada di Presidente di Parlamento i demas parlamentario;
• Entrada di Gabinete Pisas;
• Entrada di su Ekselensia Gobernador sra. Lucille George-Wout i esposo;
• Entrada di atleta di aña Vanessa Mercera kompañá pa atletanan di kareda di relevo, pa duna inisio na seremonia ofisial;
• Menshon di aktonan meritorio di Baluartenan di Barionan di Kòrsou ku ta partisipá na e seremonia protokolario;
• Entrada di Peloton di Bandera;
• Mensahe di representante di lidernan spiritual; 
• Last Post na honor di tur esnan den felis memoria;
• Petishon di Komandante di Peloton na Minister Presidènt Gilmar Pisas pa hisa Bandera di Kòrsou;
• Akto solèm di hisa Bandera di Kòrsou na okashon di 37 Aña Dia di Bandera di Kòrsou;
• Himno di Kòrsou presentá pa Richardt Engelhardt i Orkesta di Randall Corsen;
• Deklarashon pa un Kòrsou Resiliente;
• Diskurso di sr. Sithree van Heydoorn, Minister di Enseñansa, Siensia, Kultura i Deporte;
• Diskurso di Minister Presidènt sr. Gilmar Pisas; 
• Homenahe na representantenan di Sektor Vital (Frontliners) konsistiendo di: Representante di Tim di Krísis, Representante di Curaçao Medical Center, Representante di Tim di Bakunashon, Representante di Servisio di Ambulans Kòrsou, Representante di Kuerpo Polisial Kòrsou, Representante di Brantwer Kòrsou, Representante di Selikor, Representante di Krus Kòrá, VKC i G&GZ, Representante di Edukashon (maestro di skol), Representante di “Voedselbank”: 
• E kansion “DANKI” ta keda interpretá pa “Dibo D” bou di guia musikal Randall Corsen i Orkesta. Koreografia bou di guia di Erickson Vicario;
• Seremonia di Krus di Mérito na honor di kondekoradonan sr. Cesario La Croes, sra. Maria Diwan, sra. Grace Goede, sr. Ludwig Muyden i sr. Cedric Ridderplaat;
• Presentashon di ganadó di “Un Kanto pa Kòrsou”, Ronailys Libiee – Casimiri, Interpretando e kansion “Amor Lo Prevalesé”. Un komposishon di Eldridson Eugenia ku kompañamentu musikal di Randall Corsen i Orkesta;
• Shou Kultural Bou di guia di Erickson Vicario i koreografonan Clint Gosepa i Rachid Pieters;
• Grupo di Baile Folklóriko Ambiente Kultural (FAK) i artistanan invitá Direktor Musikal Randall Corsen;
• Poemanan di Jordan Martis, Kyon Chirino i Santley Goedgedrag;
• Presentashon di kansion: Willemstad, komposishon di Randall Corsen, kantante “Dibo D”;
• Presentashon di kansion: Pa un Mihó Mañan, komposishon di Boy Thode, Kantante Boy Thode, Richard Engelhardt, Veanira Booi Reed, Tania i Lintje Isenia;
• Potpouri Dia di Bandera: Kantantenan: Dibo D, Heinrich Pieter  i Sharrel Adjatay Denisia.
• Klousura ofisial.

Pa mas informashon di henter e aktividat por download e programa Kompletu: Programa Dia Di Bandera.

**************************

MAS NOTISIA

Ministerio konserní: Enseñansa, Siensia, Kultura & Deporte