Publiká riba 24 Febrüari 2021
WILLEMSTAD – Servisio pa Tráfiko i Transporte (UOVV) ta anunsiá ku e servisio ta será djabièrnè 26 di febrüari henter dia pa públiko. Esaki ta relashoná ku un training pa su personal.
E training lo ta unu tokante servisio na kliente. Esaki tabata planiá pa tuma lugá for di 2020, pero mirando e desaroyonan rondó di COVID-19, e no a tuma lugá mas. Pa e motibu akí, a plania esaki awor den febrüari 2021. E training ta importante komo ku e servisio ta traha diariamente ku kliente i ke brinda un bon servisio. Pa por logra esaki, ta organisá e training pa henter personal.
Tambe, ta importante menshoná ku riba djabièrnè 26 di febrüari no tin niun sita planiá, pues esaki ta minimalisá e inkumbiniensia pa nos komunidat.
Servisio pa Tráfiko i Transporte ta pidi su diskulpa pa kualke inkumbiniensia ku esaki por trese kuné. Servisio pa Tráfiko i Transporte lo ta habri bèk riba djaluna 1 di mart pa sigui brinda servisio manera kustumbrá.