Publiká riba 30 Novèmber 2020
Willemstad – Awe riba dia di enseñansa Sentro di Detenshon i Korekshon Kòrsou, e unidat di Korekshon, ta para ketu na e aspekto di edukashon durante di resosialisashon.
Eksperensia a mustra ku pa hopi kliente, na momentu ku nan rekobrá nan libertat i nan tin ku re-integrá bèk den komunidat, nan ta konsiderá esaki komo un eksperensia difísil. Hopi biaha nan no ta òf nan no ta sinti nan mes sufisiente ekipá, pa por hiba un bida produktivo, despues di nan detenshon. Ta p’esei SDKK, den su programanan di resosialisashon, ta enfoká riba edukashon di abilidatnan ku ta yuda e kliente den su bida diario. Ta importante pa siña e kliente un variedat grandi di abilidatnan pa asina finalmente nan por re-integrá mas mihó den komunidat.
Sra Malvina Cecilia, hefe di e unidat di Korekshon, ta splika ku e ta un prerogativa pa pa medio di loke ta ofresé e kliente na ayudo sosial, servisio den kuadro di su detenshon i tambe e loke ta ofresé na edukashon, su interes wòrdu lantá i mantené. Tur hende, inkluyendo personanan den detenshon, tin derechi riba enseñansa.
Den nos komunidat moderno, enseñansa ta algu masha normal. Te ora ku yega na e enseñansa i formashon di esnan ku ta detené den un prizon. E derechi di enseñansa aki ta unu interesante pa profundisá, paso tin diferente vishonnan pa ku esaki. Por ehèmpel, e reformadó por mir’é komo un medio pa suavisá un régimen duru. E trahadó por mir’é komo un medio pa tene e kliente okupá. E dosente por mir’é komo un vokashon. E personal di seguridat por mir’é komo un riesgo. Otronan ku ta kontra, por mir’é komo un privilegio ku ta wòrdu duná na personanan ku no meresé esaki, paso nan a kometé un delito, i sèn di belasting por wòrdu usá mas mihó etc. Realisashon di e derechi aki ta importante, paso enseñansa i formashon ta ofresé diferente chèns na personanan ku ta den detenshon. Un estudio ta sòru pa un detenshon signifikante. E kliente por refiná su mes riba e tereno intelektual, ku por sierto ta fortalesé nan sintimentu di outoestima. Enseñansa i formashon ta duna e kliente e chèns pa reintegrá eksitoso den komunidat. E kliente ta eksperensiá kiko ta nifiká demostrá disiplina i kompromiso pa logra metanan. Den mayoria kaso, den kasi tur prizon na mundu, e kliente no a logra un grado di edukashon i e ta wòrdu kalifiká komo dropout. Dor di enseñansa i formashon e ta haña e chèns pa amplia su konosementu di literatura i kon pa para riba su propio pia. Anto esaki sin ku e tin ku kometé delito(nan).
Sra Cecilia ta enfatisa ku ora ta trata di enseñansa den un instituto di detenshon, abilidatnan sosial, argumentashon moral i dil ku rabia òf frustrashon ta puntonan ku diariamente ta eksigí nan atenshon. Ta p’esei ora ta ofresé edukashon i formashon na personanan den detenshon, mester pone eksigensia i énfasis na programanan ku ta yuda e persona detené pa siña na un manera positivo pa tuma nan responsabilidat pa nan mes manera di pensa i nan manera di aktua. Es desir tin ku pone hopi atenshon na kon siña e persona kon pa usa pensamentunan salú ku ta yuda nan pa traha huntu i na un manera positivo den grupo. Sentral akiden ta pará: krea un ambiente positivo den SDKK, pa asina e persona detené i sigur e hóbennan ta wòrdu motivá, ta wòrdu siñá pa yuda otro, papia ku otro ora ku algu fèrfelu pasa i siña di otro.
