Notisia

Willemstad – Minister Charles Cooper ta instituí Grupo di Konsulta pa atendé ku  Seguridat Sibernétiko. Den nos mundu modèrno di awendia, nos bida diario ta dependé di infrastruktura digital. Nos ta hasi uso sea konsientemente òf inkonsientemente, di diferente mekanismo den e mundu sibernétiko. Ta importante pa esaki tuma lugá den un forma seif. Ku esaki den mente i asina prepará pa futuro, a lanta e Grupo di Konsulta aki ku lo konsistí di diferente eksperto for di diferente gremio.

E tareanan di e grupo aki ta entre otro:

• Partisipá aktivamente den diskushonnan tokante maneho sibernétiko lokal i internashonal,
• Konsehá Gobièrnu di Kòrsou riba asuntunan sibernétiko,
• Representé e sektor konserní, i sali na bienestar di e diferente gruponan ku e plataforma ta representá den nos komunidat,
• Duna konseho pidí i no-pidí, proposishonnan, i rekomendashonnan tokante aspektonan sibernétiko,
• Informá demas personanan den e diferente áreanan di trabou tokante seguridat sibernétiko,
• Atraves di e diversidat di ekspertisio den e grupo, duna diferente angulo for di kual mester atendé ku seguridat sibernétiko.

E Grupo di Konsulta aki lo konsistí di ekspertonan riba e tereno sibernétiko, ku un representante di e siguiente instansianan: Ernst & Young Global Limited, Ministerio di Gobernashon, Planifikashon, i Servisio, Asosiashon di Bankeronan, Grant Thorton, Deloitte, Ictas NV, Interpol, KPC, Ministerio di Hustisia, Ministerio di Asuntunan General, Ministerio di Tráfiko, Transporte i Planifikashon Urbano, Aqualectra, Flow/Digicel/Tres, SVB, CMC, Advent, Asosiashon di Kompanianan di Seguro, Universidat di Kòrsou, ICUC, i Kamara di Komersio.

MAS NOTISIA

Ministerio konserní: Tráfiko, Transporte i Planifikashon Urbano