Publiká riba 05 Aprel 2020
Willemstad – Kòrsou a tuma nota di un notifikashon di Merka ku nan ta intensivá nan operashon anti droga den region. Gobièrnu di Kòrsou tambe a ripará ku tin diferente publikashon via do medionan sosial.
Ta trata aki di un seri di operashon anti droga planiá. Estados Unidos, huntu ku otro partner manera Reino Hulandes, regular tin operashon similar den nos region. Gobièrnu di Kòrsou ta di akuerdo ku e akshonnan. Ta benifesiá Kòrsou tambe ora ta bringa e tipo di kriminalidat aki.
Gobièrnu ta keda den estrikto kontakto ku outoridatnan Merikano i e otro partnernan den Reino i ta sigui monitor e desaroyonan. Gobièrnu ke enfatisá un biaha mas na pueblo di Kòrsou ku e lo no pèrmití pa nos teritorio ta forma parti di ningun akshon militar kontra di Venezuela.
Ku tin militar na Kòrsou, no tin nada di haber ku e operashon anti droga Merikano. Manera ya kaba a splika, si ta hasi uzo di militarnan aktivamente pa warda nos teritorio i kostanan kontra di posibel entrada di migrantenan Venezolano. Riba petishon di Gobièrnu, milisia di Kòrsou tambe ta yuda KPC kontrolá riba e medidanan tokante shelter-in-place.
