Publiká riba 04 Aprel 2023
WILLEMSTAD – Manera indiká anteriormente, awe Gobièrnu di Kòrsou a firma un areglo mutuo ku gobièrnunan di Aruba, Hulanda i Sint Maarten. E areglo mutuo nobo ta basá riba igualdat, propiedat i komunalidat.
Ku firma di e Promé Ministernan di Aruba, Kòrsou i Sint Maarten i Sekretario di Estado di Relashonnan den Reino bou di e areglo mutuo nobo, a pone un base hurídiko pa kolaborashon pa ku ehekushon di e reformanan riba tereno finansiero, ekonómiko, sosial, edukashonal, salubridat i di hustisia.
E reformanan akí ta den ehekushon ya pa dos aña kaba a base di e Pakete Pais (Landspakket) i tin komo meta pa alsa e resiliensia ekonómiko i forsa ehekutivo di e pais na interes di su habitantenan. Esaki ta nesesario pa motibu ku e pandemia di Corona a hasi visibel e vulnerabilidat di e paisnan pa kontratempu ekonómiko i ku esaki e nesesidat di reforma.
Despues di hopi diskushon basta fuerte den nos komunidat tokante implikashon di COHO pa nos outonomia, nos a logra di terminá e diskushonnan ku Hulanda tokante COHO. Ya pa mas ku dos aña Gobièrnu di Kòrsou ta ehekutando sierto reformanan importante den sektor públiko a base di un programa di akshon (“Landspakket”) ku ya a kombení ku Hulanda fo’i dia 2 di novèmber 2020. Poko despues, esta dia 14 di yüni 2021, Gabinete Pisas II a asumí responsabilidat pa gobernashon di Kòrsou. A base di e areglo mutuo nobo ku a drenta na vigor awe mes, nos lo sigui koperá estrechamente ku Hulanda, Aruba i Sint Maarten pa ehekutá nos pakete di reforma riba un base di igualdat, konsenso i rèspèt pa e outonomia sagrado di kada pais.
Di otro banda Gobièrnu di Kòrsou a kometé su mes pa traha huntu riba ehekushon di e reformanan nesesario pa un periodo definí di 4 aña, despues di kua e areglo lo terminá outomátikamente. Hulanda di su parti lo sostené e trayekto di reforma mas tantu posibel ku e fondonan nesesario pa finansiá proyektonan di reforma i tambe ku ponementu di e konseheronan nesesario na nos disposishon, pa di tal manera asistí e islanan den implementashon di e reformanan. Pero e responsabilidat final pa kordinashon di e programa di reforma ta keda serka Promé Minister di Kòrsou.
Despues di Pasku di Resurekshon Gobièrnu lo suministrá mas informashon tokante e areglo mutuo nobo via presentashonnan pa públiko.
