Publiká riba 09 Mart 2020
Djabièrnè último empleadonan públiko di Ministerio di Salú, Medio Ambiente i Naturalesa (GMN) a bini huntu pa risibí informashon tokante e direkshon i enfoke di e Ministerio pa próksimo añanan. E direkshon aki ta basá riba maneho aprobá dor Konseho di Minister ku ta formulá di forma hopi konkreto den e dokumento “Traha huntu pa un Kòrsou salú 2025”. Esensia di e maneho ta dirigí riba un siudadano salú, ku ta kome, move, pensa salú i ku ta biba i rekreá den un medio ambiente i naturalesa salú, pa asina alkansá un komunidat di “Wellness”. Pa medio di “Traha huntu pa un Kòrsou salú 2025” ke logra move e peso di balansa di salubridat públiko di malesa, kura i kuido, pa prevenshon i biba salú na un forma holístiko i integral. E modelo di un kurpa, mente, spiritu i emoshonnan salú den un medio ambiente sosial salú.
Minister di GMN mr. Suzy Camelia-Römer a informá esnan presente ku salú ta e loke mas ta bal den bida. Pa e motibu aki e Ministerio di GMN tin e tarea konstitushonal pa promové un pueblo salú. Ku esei GMN su maneho ta bai pone muchu mas énfasis riba konsientisá nos poblashon ku kuido di bo salú ta un responsabilidat individual – kada persona ta na promé lugá responsabel pa su salú, pa loke e ta kome, bebe, move, pensa i pa tin un bon higiena. Adishonal na e responsabilidat di kada persona pa su salú tin e responsabilidat kolektivo pa un medio ambiente, naturalesa i ambiente sosial salú. Sekretario General di GMN drs. Sharlon Melfor a mustra ku ya tin vários trayekto dentro di e Ministerio di GMN ku lo ta ingredientenan ku lo kontribuí i fasilitá pa yega riba término na un komunidat kaminda Wellness ta prevalesé. E personal di GMN a risibí vários presentashonnan tokante e trayektonan den kua ta resaltá e mira integral pa por kome salú. Henter e proseso di plantashon i produkshon di kuminda tambe ta importante. E trayekto di Kunukito na kas, den bario, na kasnan di hende grandi i na nos skolnan ku ya ta algun tempu den ehekushon a tira un lus hopi kla pa ku esei. Tambe e maneho di krio di bestia i peska ku GMN ta stimulando tin su efektonan positivo riba e kalidat di loke nos ta konsumiendo.
Den kuadro di e vishon “Traha huntu pa un Kòrsou salú 2025”, personal di GMN a risibí informashon tambe di e restrukturashon di e sektor di salú mental. Tambe a presentá e sistema digital ku ta trahando ariba pa ku informashon di salú di nos poblashon pa asina por fasilitá un mihó People Health Management segun modelonan di Organisashon di Salú Mundial (WHO).
###
