Publiká riba 08 Yüli 2020
Willemstad – Derecho di manifestashon ta un derecho demokrátiko i fundamental, ku ta relashoná ku e derecho di ekspreshon liber. Ámbos derecho ta ankrá den nos konstitushon i otro leinan di nos pais, meskos ku den tratadonan internashonal.
Manifestashon ta un forma di protesta pasífiko kaminda un grupo di persona ta trese nan punto di bista i/òf nan malkontentu pa ku sierto tema spesífiko dilanti. Pa medio di e manifestashon nan ta trata di mustra ku tin un kantidat di persona den komunidat ku ta kompartí e mesun pensamentu i ku ta para tras di e motibu di e manifestashon.
E derecho di manifestashon ta kodifiká den artíkulo 11 di nos Areglo di estado “Staatsregeling”. E memorie van toelichting (MvT) di e Areglo aki ta indiká ku e derecho di manifestashon ta un derecho fundamental. Esaki ke men ku no por prohibí un manifestashon sin mas.
Gobièrnu di su parti mester garantisá seguridat di tantu e manifestante mes durante e manifestashon pasífiko, komo di otro siudadanonan ku no ta partisipá na e manifestashon. Basá riba e echo aki e MvT ta hasi posibel pa gobièrnu duna instrukshon, ku pa tene sierto tipo di manifestashon mester pidi pèrmit serka e outoridat kompetente. Tambe e MvT ta indiká ku e derecho aki por wòrdu restringí dor di gobièrnu momentu ku e derecho aki wòrdu usá pa kometé aktonan kastigabel. Pues un manifestashon no por bai en kontra di órden públiko, trankilidat, seguridat, ni protekshon di nos komunidat. Un ehèmpel di esaki ta, ku momentu ku manifestantenan ta deseá di hasi uso di vianan públiko pa nan manifestashon, mester pidi pèrmit adelantá (artíkulo 6 LOO) pa por hasi esaki. Na Kòrsou, e leinan di protekshon di órden públiko, trankilidat, seguridat i protekshon di komunidat ta establesé den e Landsverordening Openbare Orde (LOO), ku ta un ordenansa nashonal.
Kòrsou ta mará tambe na tratadonan internashonal den kual e derecho di manifestashon ta ankrá. E tratadonan ta EVRM i IVBPR, pa ser mas spesífiko artíkulo 11 EVRM i artíkulo 21 di IVBPR.
Na momentu ku un manifestashon pasífiko kambia di índole i bira unu ku tendensia violento òf ta stroba órden públiko, gobièrnu tin deber di mantené órden públiko pa protehá tantu partisipantenan na e manifestashon komo e públiko en general. E deber di gobièrnu aki ta duna Polis derecho i obligashon di aktua kontra di personanan ku hasi nan mes kulpabel na kualke akto kastigabel.
Pa medio di esaki Ministerio di Hustisia ta enfatisá ku gobièrnu di Kòrsou ta respetá i sostené e derecho fundamental di manifestashon pasífiko ku ta establesé den nos Areglo di estado. Pa e motibu aki gobièrnu semper ta duna espasio pa manifestá pasífikamente. Gobièrnu ta keda sí ku su obligashon di mantené órden públiko i komo tal por apliká sierto restrikshonnan ku ta basá riba nos leinan. Den kuadro di kualke manifestashon manifestantenan mester mantené nan mes semper na direkshon di Polis. Na momento ku tin disturbio di órden públiko Polis mester sòru pa re establesé esaki mas rápido posibel.
