Publiká riba 06 Mei 2021
WILLEMSTAD – Riba djabièrnè 30 di aprel 2021, Kòrsou i Hulanda a yega na un akuerdo pa loke ta trata kontenido i metanan konkreto di e dos agènda di ehekushon, den kuadro di reforma i desaroyo duradero di pais. Di e forma akí un paso importante mas a keda tumá den e direkshon pa ehekutá reformanan nesesario enfoká riba reforsá estado di derecho di Kòrsou i drecha e.o. su maneho finansiero, sosial-ekonómiko, di impuesto, di kuido, i den enseñansa. Durante un enkuentro virtual ku entre otro Promé Minister Rhuggenaath i Sekretario di Estado Knops, formalisashon di e di dos agènda di ehekushon a keda hasí.
E di dos agènda di ehekushon ta enserá kontinuashon di e diferente aktividat- i proyektonan ku ta bini dilanti den e promé agènda di ehekushon, ku ta kontribuí na desaroyo di un ekonomia i komunidat ku ta mas resistente i resiliente. Es desir, un ekonomia i komunidat ku ta mas mihó kapas pa atendé ku krísis, oportunidatnan nobo, i perspektiva pa siudadano i empresanan. A base di e eksperensia ku a krea ehekutando e promé agènda di ehekushon pa e promé kuartal di 2021, a hasi e adaptashonnan nesesario i a determiná e akshon i proseduranan di trabou nobo i/òf adishonal pa e siguiente kuartal. E mésun proseso akí lo tuma lugá kada kuartal, kaminda kontinuamente lo relatá esaki ku tomo di desishon di Konseho di Minister di Reino tokante mas sosten pa likides den kuadro di e krísis di COVID-19.
Promé Minister Rhuggenaath ta satisfecho ku e proseso ku Kòrsou i Hulanda a bin ta kana te ku awor. Awor mas ku nunka ta importante pa sigui dal pasonan firme i konkreto den ehekushon di e pakete di reforma di mas aña (‘landspakket’) ku ta esensial pa por surpasá e krísis sosial-ekonómiko ku nos pais ta aden i krea perspektiva pa kresementu duradero. Kontinuashon ku implementashon di e di dos agènda di ehekushon akí sin mas ta un paso importante pa logra esaki.
