Publiká riba 19 Yüni 2020
WILLEMSTAD – Kolaborashon internashonal ta algu krusial pa logra kombatí trafikshon di droga i krímen transnashonal. Na komienso di e aña aki Merka ya a anunsiá di bai intensifiká su aktividatnan pa kontra-arestá kontrabanda di droga den e region aki. Ta trata aki di un aktividat ku tabata planiá kaba pa tuma lugá den region di Karibe. Reino Hulandes ta parti di e 22 partnernan ku huntu ta forma e ‘Joint Interagency Task Force – South’ (JIATF-South) ku e propósito pa kombatí kontrabanda di droga pa medio di bon kolaborashon. Gobièrnu ta sostené tipo di aktividatnan manera esaki, ya ku Kòrsou ta benefisiá di e echo ku efektivamente ta atendé krímen organisá.
For di 2 di mart 2000 a yega na un akuerdo di kolaborashon entre Reino Hulandes i Gobièrnu di Merka pa haña akseso na i hasi uso di e fasilidatnan na Antia Hulandes i Aruba pa di forma aéreo kombatí trafikashon di droga. A base di e akuerdo aki avionnan Merikano ta hasi uso di e asina yamá ‘forward operating locations’(FOL) ku ta lokalisá na e aeropuertonan di Kòrsou i Aruba. E akuerdo ta duna solamente outorisashon pa ehekutá buelonan ku ta vigilá, monitoriá i lokalisá transportashon di droga. No tin arma riba e buelonan aki.
Pa motibu di un oumento relativamente grandi di e kantidat di kilo di droga ku ta interseptá últimamente, a disidí pa temporalmente amplia e kapasidat di FOL. Entre òktober 2019 i desèmber 2019 por ehèmpel a interseptá 12.060 kilo di kokaina i 184 kilo di mariwana ku un balor di mas ku 314 mion dòler, i entre mei 2020 i yüni 2020 ya a interseptá 8.269 kilo dorga balotá na 219 mion dòler. Ta trata di un ampliashon temporal di 4 avion, esta un E-3 Sentry (AWACS), un E-8 Joint STARS (JSTARS) i dos ‘tankvliegtuig’. Pa operashon di e avionnan lo reforsá e base di FOL ku 150 tripulantenan i personal di mantenshon den e lunanan benidero.
Gobièrnu ke enfatisá un bia mas ku e aktividatnan di kombatí droga tin di haber ku oumento di trafikashon di droga den region di Karibe i ku no lo tolerá ku ta hasi uso di su teritorio pa nada otro ku no ta solamente nesesario den kuadro di kombatimentu di droga.
Durante e promé dos simannan ku e personal yega for di Merka nan lo mester mantené nan mes na e kondishonnan mará na e instrukshonnan di COVID-19.
