Publiká riba 14 Desèmber 2019
Na aña 1636 Hulanda ta konkistá Kòrsou riba Spañonan i for di e momentu ei a kolonisá nos Isla te ku 15 di desèmber 1954, ora a konkretisá outonomia di nos Pais ku firmamentu di Statüt. Klaro ku tabatin un proseso evolusionario i emansipatorio ku a kondusí na e realidat aki den kurso di tempu. Sin embargo, tabatin dos motibu direkto den e kuadro aki kreá pa segundo guera mundial.
Primeramente ta trata aki di sierto grado di preshon di parti di Merka, ku a pone komo kondishon pa yuda liberá i rekonstruí Oropa Oksidental, e eksigensia ku tur pais kolonisadó lo mester a duna libertat na nan Kolonianan. E di dos motibu direkto tabata e echo ku durante di guera paisnan kolonisá a realisá ku nan no tabatin mester di nan asina yamá pais mama pa por a eksistí i progresá, loke ta kondusí na sierto grado di deseo pa ta independiente òf outónomo. Pues, e tereno fèrtil tabat’ei. Solamente tabata falta un lider kapasitá pa guia e desaroyo aki, I pueblo di Kòrsou (Lesa: Antia Hulandés) ta haña esaki den persona di Mr. Dr. Moises Frumencio Da Coata Gomez.
Mr. Dr. Moises Frumencio Da Costa Gomez, popularmente yamá ‘Dòktor’ tabata un intelektual altamente kualifiká, ku hasta a fungi komo konsehero di Reina Wilhelmina durante di Guera mundial. Pero mas ainda e tabata un personahe ku un sentido di hustisia i patriotismo altamente avansá; un nashonalista ideológiko loke e ta demostrá entre otro ku e echo ku e ta duna su Partido e nòmber Nashonal. Den su Tésis titulá ‘Het wetgevend orgaan van Curaçao, Dr. Da Costa Gomez ta baha pisá riba Hulanda, kritikando Hulanda fuertemente pa e manera sumamente inhustu ku esaki a trata Kòrsou (Lesa: Antia Hulandes) pa loke ta trata su Derechonan Konstitushonal. Den e kuadro aki por deskribí ideal di Dòktor komo siguiente: ‘Kambia e Kòrsou bieu den un Kòrsou nobo’. Pa Dòktor esaki tabata nifiká polítikamente: Realisashon di un status outónomo pa Kòrsou (Antia), emansipashon konstitushonal di pueblo Kurasoleño i promové posibilidat igual riba tereno sosial, ekonómiko i sosio-kultural pa tur siudadano.
Ta Dòktor a enkabesá i presidí mayoria di e delegashonnan lokal ku tabata tuma parti na e asina yamá Konfereshanan di Mesa Rondó durante kua tabata trata e proseso di outonomia pa Kòrsou, loke alolargo ta resultá den firmamentu di Statüt. Konsekuentemente por konsiderá Mr. Dr. Moises Frumencio Da Costa Gomez komo arkitekto di outonomia di pueblo di Kòrsou.
Klaro ku tin diferente otro personahe i instituto ku a aportá na realisashon di un status outónomo pa Kòrsou; entre otro Partido Democrat di aquel entonces. Ta bon pa remarká sin embargo, ku Partido Democrat den komienso a boga fuertemente pa un Kòrsou independiente, pero despues a kambia rumbo i bai apoyá e idea di un státus outónomo pa pueblo di Kòrsou.
