Publiká riba 17 Febrüari 2022
Willemstad – Resientemente Minister di GMN dr. Dorothy Pietersz- Janga tabata presente na apertura di e promé dia di e programa Biba Amor. Biba Amor ta un programa kaminda dosentenan ta haña kurso pa duna lès na alumnonan di skol tokante tur aspekto rondó di seksualidat. Meta di e programa ta pa eduká i konsientisa e hóben riba tereno di seksualidat. Di e forma aki e programa ta kontribuí tambe ku redukshon di embaraso hubenil i malesanan transmití seksualmente. Na 2009 señora Jeanine Constansia- Kook, direktor di Maneho di Ministerio di GMN, a skirbi e programa aki ku e meta pa bini ku un pakete di lès tokante seksualidat spesial pa hóbennan.
Durante su diskurso na apertura di e programa, Minister Pietersz- Janga a mustra ku por mira relashon seksual komo un unifikashon i pa un hende duna amor e mester siña stima su mes promé. Esaki sigur ta un mensahe importante pa nos hubentut ku a lanta den un époka ku materialismo ta hunga un ròl den bida di hopi di nos. Señora Jeanine Constansia- Kook a splika ku e aña aki programa Biba Amor lo bai mas skol i a gradisí e dosentenan pa sigui karga e mensahe na bienestar di nos hóbennan.
Programa Biba Amor no ta únikamente un sosten pa hóbennan pa tuma mihó desishon den nan bida pa loke ta trata seksualidat, pero por uza e informashon den tur situashon ku e alumno por enkontrá den su bida diario. E lèsnan ta bai tin un durashon di tres luna i siguí pa un prueba na final kual ta duna e alumno derecho di risibí sertifikado di partisipashon. Biba Amor ta un “joint venture” entre Ministerio di GMN i Ministerio di Enseñansa pero partisipashon di mayornan tambe ta di gran importansia den e programa aki.
Riba potrètnan, señora Jeanine Constansia- Kook, Minister Pietersz- Janga, kordinadó di programa señora Pharetza Bertad- Damon, drs. Nataly Martina i drs. Ronald Kock durante apertura di e programa.
