Publiká riba 31 Mart 2023
WILLEMSTAD – Servisio di Atmishon ta informá ku entrante djaluna 3 di aprel 2023 ta inisiá ku proyekto “Tuma bo pèrmit”. Meta di e proyekto akí ta pa duna mas tantu persona posibel un sita mas pronto pa risibí nan título di residensia.
Durante un luna, Servisio di Atmishon, lo anunsiá tur djaluna riba su página di Facebook Admission Office Curaçao, kua ta e fechanan ku ta disponibel pa traha sita. Personanan ku risibí karta di desishon positivo por traha sita riba e fechanan ku keda anunsiá. Si un persona ya tin un sita trahá ku ta kai despues di e fecha ku keda anunsiá, e persona mes por kanselá e sita i traha un nobo riba e fechanan ku a duna komo opshon. Den e e-mail di konfirmashon ku a risibí ora a traha sita, tin un lenk pa por kanselá e sita.
Servisio di Atmishon ta urgi tur persona ku traha un sita, pa akudí riba e dia di e sita. E rekisitonan ku kada persona mester presentá kuné riba dia di e sita ta menshoná den e karta di desishon bou di e punto di “afhandeling”. Un rekordatorio ta bai pa personanan ku tin un promé petishon, pa hasi pago di e depósito promé na Servisio di Impuesto. Si no presentá ku e rekisitonan nesesario no por risibí e título di residensia i mester traha un sita nobo.
Pa mas informashon tokante Servisio di Atmishon por subi website www.immigrationcur.org òf página di Facebook i Instagram Admission Office Curaçao.
