Publiká riba 25 Novèmber 2020
WILLEMSTAD – Den kuadro di temporada di áwaseru, Servisio pa Planifikashon Urbano (ROP) ta urgi tur doño ku tin edifisionan, spesífikamente den nos sentro di siudat, pa laga kontrolá kondishon di e edifisionan. Di e manera akí, por minimalisá e chèns pa un derumbe (“instorting”) di kualke forma ku por okashoná dañonan direktamente òf indirektamente na persona i/òf material.
Doñonan di edifisionan den nos sentro di siudat tin e obligashon di mantené nan edifisio den bon kondishon. Esaki ta konforme e stipulashonnan den e lei ‘Monumenten Eilandsverordening’ artíkulo 12, insiso 1 i e lei ‘Bouw- en Woning Verordening’ artíkulo 9, insiso 1. Den diferente inventarisashon a sali na kla ku hopi edifisio, tantu monumentonan protehá komo otro edifisionan, no ta keda mantené dor di nan doño i pa e motibu akí ta den un mal estado.
ROP a manda diferente karta pa doñonan di edifisio den nos sentro di siudat pa informá nan ku a konstatá ku nan edifisio ta den mal estado, debí na falta di mantenshon. E doño tin e deber di hasi mantenshon na su edifisio. Debí ku ROP no ta risibí oido di e doñonan akí, ROP ta hasi un yamada urgente na doño di tur edifisio den nos sentro di siudat pa kontrolá i mantené nan edifisio.
Den kaso kaminda e situashon bira asina urgente i ta forma un peliger evidente pa bienes i bida di otronan, ROP ta hañ’é obligá pa aktua i hasi mantenshon urgente i nesesario na e edifisio òf ta sera e área rondó di e edifisio pa evitá ku esaki ta hasi daño na hende òf material. Naturalmente, e gastunan akí no por ta pa kuenta di Gobièrnu, pero lo manda e kuenta pa e doño indikando ku e tin ku paga esaki. Sinembargo, e fondonan di Gobièrnu ta limitá i e gastunan inesperá akí ta afektá operashon di henter e aparato.
Ministerio di Tráfiko, Transporte i Planifikashon Urbano ta informá ku e doño di e edifisio den mal estado ta responsabel pa dañonan direktamente òf indirektamente okashoná na persona i/òf material a konsekuensia di un derumbe (“instorting”) den kualke forma.
Den kaso ku ta deseá un konseho relashoná ku reparashon na un monumento i demas edifisionan den mal estado, por tuma kontakto ku ROP na Plaza Horacio Hoyer 19, number di telefòn 433-3200. Por aserká Stichting Monumentenfonds Curaçao na telefòn 465-4688 na momentu ku e doño di un monumento ta deseá informashon tokante finansiamentu pa restourá esaki.
