Publiká riba 23 Mart 2021
WILLEMSTAD – Dia 20, 22 i 23 di mart, en konekshon ku formashon di un gabinete nobo, Gobernador di Kòrsou,
señora L.A. George-Wout, a tene konsultá ku vise presidente di Raad van Advies, presidente di
Parlamento, Promé Minister demishonario, Minister di Estado, un delegashon di SER, un delegashon di Konseho di Iglesia i lidernan di e partidonan polítiko ku a optené un òf mas asiento
den Parlamento, a base di resultado di e elekshon di dia 19 di mart 2021.
A base di e rekomendashonnan emití, Gobernador a papia ku e informadónan, señornan R.S.J. Martha i Ch. Peterson. Gobernador e pidi ámbos kabayero hasi un investigashon pa posiblemente yega na
formashon di un gabinete di kua e komposishon ta hasi hustisia na resultado di elekshon.
Kòrsou ta enfrentando desafionan importante, spesialmente respekto di redukshon di pobresa,
rekuperashon di finansa públiko, desaroyo ekonómiko, e lucha kontra retraso den edukashon,
mehora di atenshon médiko, lucha kontra delinkuensia i rekuperashon di infrastruktura. E
relashonnan den nos propio pais i ku e demas paisnan den Reino ta rekerí un rumbo klarito i diálogo
konstruktivo. Ta di importansia ademas pa e polítika ku e gobièrnu nobo ta bai hiba, kontribuí na
stabilidat i trankilidat den e komunidat akí, meskos tambe ku den gobernashon lo e tin konfiansa
ampliamente kargá basá riba rèspèt mutuo.
Ku tal motibu, Gobernador a pidi señornan Martha i Peterson pa den lus di loke a menshoná anteriormente, nan investigá rápidamente kua ta e partidonan polítiko ku a optené un òf mas
asiento den Parlamento ku ta dispuesto na entablá un kooperashon basá riba un vishon komun pa loke ta e forma di bòrda e desafionan ku nos pais ta enfrentá.
E investigashon akí lo mester kondusí na formashon di un gabinete ku:
– ta konta ku un mayoria amplio den Parlamento di Kòrsou;
– ta demostrá un sentido di urgensia den e forma di bòrda e desafionan ku Kòrsou ta
enfrentando.
Gobernador a pidi ámbos informadó pa mas tardá dia 6 di aprel 2021 nan reportá resultado di nan tarea i pa promé ku dia 30 di mart 2021 nan presentá un informe provishonal di progreso di nan
trabou di informashon.
