Notisia

WILLEMSTAD – Gobièrnu di Kòrsou ta rekonosé ku nos tin hopi talento i ku nos mes hendenan ta traha di forma positivo i representá nos pais di forma dignamente. P’esei ta duna publisidat i rekonosementu na nos mes hendenan ku ta ehèmpel pa nos hubentut. Minister di Enseñansa, Siensia, Kultura i Deporte sr. Sithree ‘Cey’ van Heydoorn ta rekonosé hóben adulto Rovendley Welvaart pa su trabounan eksepshonal den produkshon di pelikula (shortfilms).

 Rovendley Welvaart ta un hóben ku a studia ‘video production’ i ‘fashion design’ na George Brown College na Toronto, Canada. El a traha vários produkshon manera: “E ta bini – wela”, “Press on Marrely”, “Layo” i ‘shortfilm’ “Tahit” ku a gaña premionan nashonal i internashonal. 

Resientemente na aña 2020, Rovendley tabata un di e asistentenan di direktor di e pelíkula “Buladó” ku a gana e premio ‘het Gouden Kalf’ na Hulanda. “Buladó” ta for di mart 2021 riba e plataforma Netflix. Tambe huntu ku un grupo di amigu nan a lansa na aña 2019 e liña di paña “Extra Wavy”. “Extra Wavy” ta keda trahá ku su mes tela úniko ku ta hasié sòft i dushi pa bisti, pa e motibu akí “Extra Wavy” a risibí invitashon pa partisipá na New York Fashion Week 2019, pa asina presentá na mundu e tela inovativo akí. E siguiente kolekshon di “Extra Wavy” ta den fase final na e momentunan akí.

Ta importante pa sigui duna publisidat i rekonosementu na nos mes hendenan ku ta traha di forma positivo i eksepshonal. Gobièrnu ta hasi hustamente esaki dor di rekonosé personanan ku ta parti di nos pueblo talentoso siendo digno representantenan di Kòrsou. Pa mas informashon por bishitá e linknan:

• Tahit – Behind the Scenes
• Rovendley Welvaart – Digicel Play Go

** Riba e fotonan athunto por tuma nota di momentu ku Minister Van Heydoorn ta hasi entrega na e hóben Rovendley Welvaart