Djamars 4 di mei ta konmemorá víktimanan di Di Dos Guera Mundial
Publiká riba 02 Mei 2021
WILLEMSTAD – Djamars 4 di mei 2021 Kòrsou ta rekordá i duna rèspèt na esnan ku a sakrifiká nan bida pa nos pais durante guera. E aña akí e seremonia lo ta mas simpel sin públiko i adaptá na medidanan relashoná ku e pandemia di Covid-19. Gobièrnu di Kòrsou, Marina Real i VKC lo para ketu na e okashon akí pa pone krans na e ‘Monumento di Víktimanan di Guera’ na Waaigat.
Tur aña dia 4 di mei, igual ku e otro paisnan den Reino, nos ta rekordá tur hende ku na un òf otro manera a pèrdè nan bida durante di gueranan i atakenan terorista pa nan pais. E dia di konmemorashon akí tin su rais den e Di Dos Guera Mundial. Mas ku 160 di nos hendenan a pèrdè nan bida den e temporada ei. Esaki ta motibu pa duna rèspèt na e akto heroiko akí ku a nifiká hopi nos pais.
E seremonia na e monumento na Waaigat ta 9’or di mainta. E di dos parti ku ta sigui na Santana Militar na Roodeweg, ta kuminsá 10.30’or di mainta. Presidente di “Stichting Militair Erfgoed Curaçao” (SMEC), lo hiba palabra na santana. Tantu e seremonia na Waaigat komo esun na Santana Militar lo tin un durashon di aproksimadamente 25 minüt.
En konekshon ku e seremonia ta bai tin algun kambio den tráfiko. Dia 4 di mei próksimo ta sera kaminda temporalmente. Ta bai tin tambe un kambio temporal pa transporte públiko. Tene kuenta ku:
- for di 06.00 ‘or di mainta te ku 10.00’or di mainta no ta permití tráfiko motorisá via di De Ruyterkade den direkshon di Plaza Sha Capriles;
- ta desviá e tráfiko motorisá ku ke hasi uso di De Ruyterkade via di Plaza Smeets direkshon di Nieuwestraat;
- Pietermaai, sentro di Punda i besindario lota aksesibel solamente via di Nieuwestraat, Theaterstraat i Pietermaaiweg;
- Lo desviá tráfiko motorisá den área rondó di Marshe Nobo i De Ruyterkade via Kaya Junior Salas direkshon di Pietermaai;
- Tráfiko ku ta bini via Prinsenstraat pa bai Kaya Junior Salas, ta prohibí pa bai na man robes;
- Pa 7:30’or di mainta lo sera tráfiko na e krusada di Wilhelminabrug, De Ruyterkade i Plaza Sha Capriles, di manera ku tráfiko motorisá no por sigui bai direkshon di De Ruyterkade i lo keda desviá via Wilhelminabrug direkshon Scharlooweg;
- Transporte públiko (bùsnan chikí i tambe bùsnan di A.B.C. busbedrijf) lo bai hasi uso di e área di NAAM (kaminda ántes tabata Biblioteka Públiko) durante di e oranan stipulá komo ‘eind-/beginhalte’ i despues sigui nan destino;
- ‘Bestemmend verkeer’ so por sigui bai Punda via Nieuwstraat (Bestemmend verkeer ta enserá minister i parlamentarionan, trahadónan di Ministerio Públiko i Forti, doñonan di pakus, trahadónan di hotèlnan òf hendenan ku ke hasi uso di Pietermaai Parking Mall / trahadónan di Marshe i taksistanan);
- Pa e dia promé, esta 3 di mei, lo tin un training relashoná ku e seremonia di e siguiente dia. E mésun kambionan temporal / desviashon di tráfiko pa dia 4 ta konta pa e dia aki tambe.
Gobièrnu ta pidi pa tene kuenta ku kambionan temporal di tráfiko den kuadro di e seremonia.. Si situashon kambia lo mester sigui òrdu di polis.