Publiká riba 01 Desèmber 2020
Willemstad – Komunidat kompletu por a tuma nota den fin di siman na momentu ku hopi áwaseru ta kai i esaki a trese bastante molèster. Sigur pa loke ta trata roinan ku ta yená ku tur sorto di opheto i ta pone ku awa no por sigui move. Servisio pa Obra Públiko (OW) ya pa algun siman kaba, a kuminsá ku limpiamentu di roinan rònt Kòrsou. Ta trata aki di mas o ménos 75 roi, repartí den diferente área di Kòrsou.
Un total di 70 kontratista a haña e tarea pa limpia e roinan. E trabounan ta konsistí di saka tera i sushi for di ‘duiker’ nan, kap palunan kaminda esaki ta nesesario, i saka tur sobra desperdisio for di e roinan. A surgi un tardansa den ehekushon di trabounan di limpiamentu di roi ku normalmente mester a kuminsá den luna di sèptèmber. Esaki teniendo kuenta ku e periodo di áwaseru. Ainda no a alkansá pa limpia tur roi i p’esei por sosodé ku awor ku áwaseru ta kai konstantemente por surgi problema ku awa.
Ban yuda mantené e roinan limpi. No tira sushi òf potoshi den nan. Unabes ku nan ta limpi, ban perkurá pa nan keda limpi. Asina nos ta yuda protehá nos mes, nos bisiña i tambe medio ambiente i naturalesa.
Minister Jesus-Leito ta satisfecho ku e trabounan ta tumando lugá i huntu ku Servisio pa Obra Públiko ta gradisí komunidat pa e pasenshi desplegá. Ban duna di nos parti i sigui mantené e roinan limpi.
