Publiká riba 07 Mei 2020
Gabinete Rhuggenaath a tuma na su enkargo e tarea importante pa guia nos pais na kambionan duradero na bienestar di Kòrsou.
Sinembargo, realidat ta ku no opstante e determinashon ku ta eksistí pa atendé e diferente akshonnan korektamente, desaroyonan imprevisto i fuera di nos alkanse, a trese retonan grandi kuné. E reto aki yama COVID-19.
Manera nos a bisa kaba, nos a logra hopi den nos lucha kontra di COVID-19. Apesar di esaki, lastimamente, i kontra di nos propio boluntat, mester bai tuma akshonnan mas severo ku originalmente tabata intenshoná, pero awor riba e área finansiero. Esaki pa motibu di nos ekonomia ku ya pa vários aña kaba ta den un estado krítiko i ku a konsekuensia di e COVID-19 lástimamente a sigui empeorá di forma signifikante i apnòrmal. Esaki ademas a impaktá entrada nan di gobiernu ku konsekuensia ku no tin sufisiente likides i kapasidat pa duna alivio na esnan ku ta sufriendo a konsekuensia pa motibu di COVID19
Konsekuentemente, Gobièrnu di Kòrsou a yega na desishonnan konkreto kon pa kòrta den e gastunan enorme di e aparato gubernamental i duna un impulso na nos ekonomia i e área sosial.
Primeramente por informá ku e desishon pa duna e empleadonan públiko di 60+ e opshon pa tuma retiro boluntario a keda aprobá pa konseho di Minister. Ya kaba e proseso pa yega na un lei ta kanando su kaminda. Ademas, apesar di a kòrta 35 mion e aña aki kaba, Gabinete Rhuggenaath a tuma e desishon pa kòrta 10% den e aparato públiko dor di alsa efisiensia di trabou ku introdukshon di entre otro outomatisashon, baha gastunan di utilidat, sentralisashon di algun departamento, i bin ku otro inisiativanan inovativo. E implementashon di e ahustenan aki ta yuda spar alrededor di 25 pa 30 mion florin pa aña. Pa esaki un tim sentral lo entregá un plan di akshon den e siguiente 2 siman.
Banda di e aparato gubernamental lo bai implementá e ‘nullijn’ e diferente empresanan di Gobièrnu, fundashonnan i organisashonnan supsidiá pa Gobièrnu pa un periodo di 3 aña, esta di yanüari 2021 te ku desèmber 2023. Esaki ta nifiká ku pa e próksimo 3 añanan, tur entrada di personal ta keda di fris.
Tur e kompanianan di Gobièrnu, fundashonnan i organisashonnan supsidiá pa Gobièrnu ta haña 1 aña pa kanalisá tur e prosesonan nesesario pa yega na adaptashon di e salarionan i benefisionan sekundario di tur Direktor i/òf funshonario haltu. Esaki ta nifiká ku tur e salarionan i benefisionan segundario ta keda reglá na un nivel korespondiente ku e empleado públiko di alto rango di Gobièrnu. SBTNO, lo ta na enkargo di esaki, kaminda segun prinsiponan di Corporate Governance lo bai tene kuenta ku e mesun ‘norm’ ku a usa na 2016.
Pa loke ta trata OB lo hasi un ahuste kaminda produktonan di promé nesesidat ku ya tabata liber di impuesto lo keda asina, pero tur otro produkto ku anteriormente tabata kobra sea 6, 7 òf 9% di impuesto lo subi te na òf mantené e 9%. Riba konseho di Banko sentral di Kòrsou di St. Maarten, Ministerio di Desaroyo Ekonómiko i Fondo Monetario Internashonal, IMF, a skohe pa no sigui ku e ‘solidariteitsheffing’, pero pa konsiderá mas bien pa bin ku impuesto indirekto ku ta hasi posibel ku asta esun ku no ta paga e otro tipo di impuestonan, tambe ta paga. Den e periodo benidero lo mester hasi e investigashonnan nesesario pa evaluá ABB den kuadro di un revishon andando di nos sistema di impuesto.
Preis di kombustibel manera stipulá riba 1 di mei 2020 por lo pronto no lo kambia i tur fondo adishonal ku por surgi pa motibu di redukshon di tarifanan riba merkado internashonal ta bai pa Fondo di Sosten i Desaroyo Sosial. Ke men e sèn ta bai direktamente pa nos hendenan ku mas tin mester.
Manera ya a anunsiá, ta bai retené 10% riba salarionan bruto di Ministernan di mei te ku desèmber 2020 ku ta keda destiná pa hendenan ku tin ku risibí alivio sosial.
Pa luna lo bai paga te un máksimo di 60 ora na ‘overtime’ anto sobrá oranan lo duna komo ‘time back’. Esaki ta konta no solamente pa Gobièrnu pero pa tur entidat ku ta kai bou di Gobièrnu.
Adishonalmente lo kobra 5% riba tur transakshon ku ta tuma lugá atraves di Western Union i Moneygram pa invershonnan ku tin ku tuma lugá riba nos pais.
E ahustenan aki ku brevemente mi a menshoná, ta duna un bista di tur esfuerso ku Gobièrnu ta hasiendo apesar di tur kontratiempo i lo bai sigui hasi den futuro serkano, pa logra yega na un balansa entre un pais finansieramente sano, un ekonomia floresiente i asuntunan sosial ku ta risibí e atenshon nesesario. Nos a tuma akshon riba kada un di e puntonan aki, ya ku Covid-19 realmente a hinka nos den un situashon sumamente difisil ku no por a hasi otro.
Mi ta konta riba tur siudadano pa duna di nan banda kaminda esei ta nesesario, apesar di kon duru ku esaki por ta. Tabata hopi duru sakrifiká keda kas pa nos por kombatí Covid, pero for di mañan, djabièrnè 8 di mei, nos por wak e resultadonan positivo. E mesun sakrifisio nos ke pidi komunidat pa hasi, ya mañan nos por bolbe gana un otro bataya a konsekuensia di Covid-19.
Nos lo sinta ku tur e partner sosial i di diálogo pa asina sigui elaborá riba kontenido i ehekushon di kada ahuste.
Nos a logra hopi, pero ainda falta. Tiki tiki i huntu nos ta yega na e resultado positivo tan deseá i un pais mas fuerte.
