Publiká riba 29 Sèptèmber 2020
WILLEMSTAD – E siman aki ta siman di ‘Curaçao SDG Action Week 2020’. Un siman kompletu yená ku temanan ku tin di haber ku e Metanan pa Desaroyo Sostenibel (Sustainable Development Goals – SDGs) di Nashonnan Uní pa Kòrsou. Riba e di dos dia, esta 29 di sèptèmber 2020, a duna atenshon na 2 SDG, esta Salu i Bienestar (SDG-3) i Kalidat di Enseñansa (SDG-4).
E di dos dia di ‘Curaçao SDG Action Week 2020’ a habri ku seshonnan interesante kaminda partisipantenan por a kòmbersá virtualmente (‘roundtables’) ku otro. Pa loke ta SDG 3, esta ‘Salú i Bienestar’ Sra. Nicola Taylor, Program Management Specialist di Pan American Health Organization (PAHO) su ofisina na Trinidad i Tobago, huntu ku Sra. Soraya Verstraeten, Direktor di e Instituto di Investigashon pa Salubridat Públiko di Kòrsou a elaborá riba entro otro e importansia di disponé di data pa por midi desaroyo di e SDG aki.
A amplia tambe riba e tema di embaraso hubenil i kua práktikanan a mustra internashonalmente di ta duna fruta. Asina a menshoná e importansia di desaroyo di e hóbennan pa por garantisá ku nan tin un mihó futuro (enseñansa, aktividatnan despues di skol, deporte, ets.). Alabes mester enfoká riba mehorashon di e dunamentu di edukashon seksual via programanan na skol i kampañanan multi-medial lokal.
Parti atardi a analisa e di 4 SDG, esta ‘Kalidat di Enseñansa’ atraves di e tópiko ‘Edukashon for di un perspektiva lokal: Kòrsou i Karibe’. Faryal Khan, Programme Specialist alabes UNESCO Sub-regional Officer pa Karibe, i ku Laurette Bristol, Programme Manager Human Resource Development di e sekretariado di CARICOM, huntu ku Nicole Wever, Kolaboradó di Maneho pa Ministerio di Enseñansa Siensia, Kultura i Deporte, (OWCS) i alabes miembro di e ‘Regional Steering Committee’ pa Latino Amerika i Karibe, a duna e seshon aki.
Aspektonan klave ku a bini dilanti durante e seshon tabata e metanan stratégiko pa enseñansa ku ta: 1) promové kalidat di enseñansa en general, 2) enseñansa ku ta konektá ku oportunidatnan den sektor laboral i ku ta konektá ku demanda for di nos komunidat, 3) forma e siudanano di Kòrsou i prepar’é pa e por ta un bon siudadano global, 4) subi akseso na enseñansa, i 5) mehorá e struktura i finansiamentu di enseñansa.
E programa di ‘Curaçao SDG Action Week 2020’ ainda ta kargá ku varios seshon interesante. Registrashon pa partisipá ainda ta posibel via e página di Facebook: SDG Curaçao 2030. Pa mas informashon, bishitá e wèpsait www.curaçao2030.cw. Tambe por tuma kontakto libremente via Instagram òf un di e plataformanan virtual i subi e plataformanan pa disfrutá después di e seshonnan den bo propio tempu.
Un gran kantidat di oradó lokal i internashonal a uní forsa pa duna atenshon na e desaroyo di SDG’s na Kòrsou. E entusiasmo pa sigui papia tokante e desaroyo sostenibel di Kòrsou ta sigui henter e siman aki, pues registrá pa bo tambe forma parti.
