Publiká riba 06 Ougùstùs 2021
WILLEMSTAD – Resientemente gerensia di prizòn a tuma nota di un informashon ku ta sirkulá den medionan di komunikashon, tokante un bishitante ku a bin bishitá su ser kerí i no a risibí e tempu kompletu di bishita.
Gerensia di prizòn ta lamentá e suseso akí i ta pidi diskulpa pa kualke inkumbiniensia ku esaki por a trese kuné. Gerensia a tuma nota di e informashon akí i a tuma tur medidanan nesesario interno, p’asina por sigui garantisá bon servisio durante di bishita. Ta importante pa enfatisá sí ku tur persona ku bishitá prizòn, mester tene su mes na tur e reglanan ku tin vigente i tambe na e medidanan di Covid-19 stipulá.
Tambe gerensia lo bai tuma kontakto ku e bishitante ku a keda perhudiká, p’asina koregí e fayo ku tabatin i el lo risibí e diferensia di tempu bèk komo rekompensa durante su siguiente bishita.
