Willemstad – 19 di Mei 2020- Mientras tantu ta kasi 4 siman pasá ku por a entregá e promé petishonnan pa por bini na remarke pa e areglo di NOW. Mayoria empresa ku por bini na remarke a risibí pago kaba, i probablemente pa fin di siman por kuminsa entregá e petishonnan pa luna di Mei. Pa medio di e komunikado aki Gobièrnu i e tim di NOW ta ofresé informashon tokante e último desaroyonan.
Entre 18 i 22 di Aprel e dunadó di trabou por a inskribí nan kompania pa bini na remarke pa e Medida di Urgensia Sosten Transitorio pa Empleo (NOW- noodmaatregel overbrugging werkgelegenheid), kual SVB ta ehekutá. Despues ku a añadí sektor na e lista ku por a bini na remarke pa e sosten, un kantidat mas por a apliká pa esaki entre 25 pa 30 di Aprel. E intenshon ta pa e lunanan binidero sigui ofresé e posibilidat pa apliká pa sosten. E dunadó di trabou ku a eksperensiá un bahada di entrada di 25% of mas (kaminda ta kompará e entrada di Aprel 2020 ku e entrada di Aprel 2019), por a risibí sosten pa medio di SVB. Ta trata di un montante ku ta igual na 22-89,5% di e sumo di suèldu ZV/OV segun e registro di SVB riba 28 di Febrüari 2020 (esaki ta inkluí e kontribushon di e dunadó di trabou na e gastunan AOV/AWW). Tambe e direktornan registrá den e statüt di e kompania, i registrá na SVB, ta inkluí den e kalkulashon. Pa kada empleado ta kalkulá e montante di sosten, pero ta tene kuenta ku e suèldu máksimo (e suèldu máksimo segun SVB ta ANG 5781,- pa luna).
Pa por a realisá tur e trabounan relatá na e areglo, a krea un team ku ta konsistí di representante di ministerionan konserní i representante di sektor privá. E representantenan aki i tur otro persona ku a yuda ku e implementashon, a partisipá pro bono, pues sin risibí pago pa e trabou aki. Pues e kosto relatá na realisashon di e areglo aki ta sero. Ora a implementá e areglo, e miembronan di e tim a mantené nan mes na tur e proseduranan gubernamental ku ta evaluá i usuál segun SOAB; akseso na informashon konfidenshal ta limitá na SVB; i SVB ta tuma e desishonnan pa asigná, ku konseho di sektor pa medio di Kámara di Komèrsio, i ku kontròl di kada kompania dor di SBAB.
Tin ku ta pensa ku no tin un base hurídiko pa ehekutá e areglo aki. Esaki no ta kuadra ku berdat.
Nos país ta den un situashon di krisis, i tabata di sumo importansia pa bini ku un solushon a korto plaso.
Finalmente tabatin solamente 8 dia pa implementá e areglo pa medio di un portal ku a kreá for di nada. Esaki ta nifiká ku a kolaborá mes ora ku e departamentu di gobièrnu ‘Wetgeving en Juridische Zaken’ pa inkorprá un prosedura aselerá, pa por bini ku un Landsbesluit speshal pa e areglo aki, i pa hasi posibel ku ta implementá a areglo ku forsa retroaktivo for di e fecha 1 di Aprel. Den e Landsbesluit aki a pone tur disposishon legal, i despues di aprobashon di Konseho di Minister, a manda e Landsbesluit aworaki pa SER i Konseho di Konsulta (Raad van Advies). Lo publiká e vershon final pronto.
Ta importante pa kompanianan kompronde e struktura di e areglo. Ta trata sosten pa un parti di e entrada di e kompania ku a kai afó, pasobra pa e parti kaminda tin entrada ainda, e kompania no tin mester di sosten. Pa e parti kaminda no tin entrada, e kompania ta risibí kompensashon pa un di e gastunan di operashon mas grandi, kual ta e salarionan. Alabes hopi kompania a risibí sosten pa medio di suspenshon di pago di amortisashon i interes di banko, i a baha nan gastunan di suèldu, por ehèmpel pasobra kontratista no ta den servisio mas. Kompanianan ku un entrada di apróksimadamente 5 mion florin por apliká pa un krédito di Empresa Chiki i Mediano pa medio di www.fondodisosten.org.
Den e kaso ku un empleado ta konfrontá ku adaptashonnan den e akuerdo laboral ku no ta aprobá segun e areglo, nan mester tuma kontakto ku e Heldesk di SOAW dediká na esaki, pa medio di e-mail sostenemi@fondodisosten.org). Si resultá ku un dunadó di trabou no a tene su mes na e akuerdonan stipulá, lo informá SVB, ku lo investigá esaki i posiblemente lo eksihí pa e dunadó di trabou debolbé e supsidio pa suèldu ku a risibí.
Ya pa algun siman Gobièrnu ta trahando riba realisashon i implementashon di e areglo aki, i alabes ta hasiendo su esfuerso pa sigurá e fondo; prinsipalmente pa medio di finansiamentu for di Hulanda. A logra esaki. Ophetivo den esaki tabata pa krea un prosedura pa por hasi aplikashon pa medio di un plataforma digital, fásil i lihé, p’asina por a paga e kompanianan di un forma rápido i promé ku fin di luna. Ta parse ku a logra e ophetivo aki. Kompanianan por a entregá nan petishon for di Djasabra 18 di Aprel (e portal pa e Fondo di Sosten tabata aksesibel for di djabièrne 12’or di anochi), te ku Djarason 22 di Aprel 12’or anochi (i pa e sektornan ku a añadí despues, esaki tabata posibel te ku 30 di Aprel). E promé pagonan via SVB a tuma lugá riba Djarason 29 di Aprel.
No opstante ku resientemente ainda tabatin petishonnan den proseso, ta evidente ku masalmente a apliká pa e areglo di NOW. Mas ku 1250 petishon pa supsidio a risibí aprobashon di kua mayoría a risibí pago kaba i di kua un parti lo risibí pago e siman aki. A referí algun kompania pa SVB pa trato di nan kaso, sinembargo nan no a bini na remarke pa motibu ku nan no a registrá nan suèldu total na SVB, òf pasobra nan no a anotá nan informashon bankario, òf pa motibu di problemanan ku impuesto. E petishonan aprobá ta representá mas ku 17.000 empleado ku danki na e areglo di NOW por a mantené nan trabou. Esaki ta mas ku 45% di e empleadonan ku ta registrá na SVB. Durante e periodo di aplikashon a surgi e impreshon ku a desaprobá e petishon di un gran kantidat di empresa, i ku un kantidat no por a bini na remarke. Pero esaki no tabata e kaso. Mas ku 2000 e-mail a drenta na e Helpdesk. Aki tabata trata di sigur 250 kaso kaminda kompanianan no tabata posishoná den e sektor korekto, pa motibu ku nan no tabata registrá korektamente na Kámara di Komèrsio. A logra koregí kasi tur kaso a base di e informashon ku nan a suministrá. En total a rechasá no mas ku 40 petishon definitivamente, a base di e kontròl di sektor, pues algu mas ku 3%.
Mientras tantu e tim di NOW ta trahando duru atrobe riba inventarisashon di tur e puntonan di mehorashon pa loke ta trata e proseso pa sigurá ku e siguiente tanda den luna di Mei por kana aun mas mihó. Lo amplia i mehora e formulario; kompanianan ku ya a risibí aprobashon den e promé tanda lo risibí un URL-link e siman aki ku un invitashon pa entregá nan petishon pa luna di Mei; e kontròl di SVB i e kontròl di impuesto lo tuma lugá simultaniamente pa asina spar tempu; lo amplia e kapasidat di e Helpdesk; i lo mehorá e komunikashon ku e personanan ku ta apliká. Tambe ta pensando kon pa solushoná e problema pa kompanianan ku no a tene nan informashon den registro di SVB up-to-date, i si por bin ku un akuerdo ku empleadonan pa baha salario. Na momentu ku habri e portal atrobe, lo anunsiá kon lo inkorporá e detayenan relatá na e kondishonnan di Hulanda.
