Notisia

WILLEMSTAD –  Den su afan pa krea mas posibilidat pa praktiká deporte, Sektornan di Gobièrnu ku ta kolaborá pa fasilitá organisashonnan ku un tereno deportivo a bai hasi un bishita na Jandoret. Manera konosí, Gobièrnu di Kòrsou pa medio di Ministerio di Enseñansa, Siensia, Kultura i Deporte a start ku un trayekto pa yega na un maneho nobo pa lokual ta trata e forma ku ta bai atendé ku fasilidatnan deportivo. E maneho akí a sali for di punto di bista di nesesidatnan ku tin i ta surgi den pueblo pa ku praktikamentu di Deporte. E sektornan di Kultura i Deporte i Domeinbeheer huntu ku Fundashon Desaroyo Deportivo Kòrsou a traha riba e forma ku ta bai ehekutá e maneho ku a keda aseptá pa Gobièrnu di Kòrsou riba fecha 12 ougùstùs 2020.

Konforme e maneho nobo, Gobièrnu di Kòrsou lo bai sera akuerdo di maneho ku organisashonan ku ta bini na remarke pa hasi esaki pa medio di kumpli ku sierto kriterionan. Sektor Kultura & Deporte a start e trayekto akí ku un inventarisashon di e fasilidatnan i seguidamente a organisá un periodo di inskripshon kaminda tur organisashon por a inskribí saliendo for di nan eksperensia i nesesidatnan. Esaki a tuma lugá entre  10 i 24 di yanüari 2020. Esaki pues ta un trayekto salí netamente for di pueblo pa pueblo.

E área di Jandoret i besindario a konosé (tres) 3 inskripshon. Real Athletics a inskribí pa e tereno di baseball veterano. SV De Koning a inskribí pa e tereno di futbòl. Atletiek vereniging  Sparta pa e tereno di atletismo ku ta ser usá pa e organisashon mes for di aña 1978 i e organisashon St. Michiel Shark Baseball Academy pa un tereno di baseball ku lo mester keda kreá ainda. E dos organisashonnan Atletiek Vereniging Sparta i St. Michiel Shark Baseball Academy a bai traha huntu i formulá un masterplan pa e área. E masterplan ta enserá ku lo bini un pista di atletismo, un fasilidat pa e deporte di baseball i un tipo di koredor kaminda por kana.

 St. Michiel Sharks Baseball Academy na e momento akí ta den kampeonato i no ta disponé di un tereno pa nan entrená. E organisashon akí konosé un kantidat di 150 mucha. E organisashon pa por entrená ta hasi uso di e tereno di futbòl i esun ku baseball veterano ta usa aktualmente. Komo ku aktividatnan di tantu futbòl i baseball veterano ta bai kuminsá, e muchanan di St. Michiel Sharks Baseball Academy mester stòp di entrená riba e vèltnan en kuestion. Ta deber di e Sektor di Kultura & Deporte pa fasilitá e proseso pa no stroba e proseso di entrenamentu di nos muchanan. Meta di Sektor di Kultura & Deporte ta keda pa hasi deporte aksesibel pa pueblo di Kòrsou en general i spesífikamente nos muchanan ku a demostrá di ta saka kara di nos pais konstantemente. Esaki a trese kuné ku mester aselerá e proseso pa e.o. St Michiel Sharks Baseball Academy por haña un tereno.

E área konserní ta kai bou di Eilandelijk Ontwikkelingsplan (EOP) ku ta áreanan di naturalesa ku mester keda konservá. Esaki ta trese kuné ku lo mester tene kuenta ku diferente lei promé ku desaroyá e terenonan akí. Gobièrnu di Kòrsou a buska kontakto ku ekspertonan riba e tereno akí pa por risibí un konseho riba esaki. Pa e motibu akí e sektornan ku ta kolaborá den e proseso di hasi e terenonan aksesibel, a bishitá e área pa wak den ki forma por realisá i ehekutá un masterplan deportivo pa Jandoret sin afektá e eksistensia di otro fasilidatnan den e área di forma ku ta krea mas posibilidat pa e bario di Jandoret i besindario por praktiká deporte.

Si tin organisashonnan ku no a inskribí ahinda i ku ta manehá un tereno den besindario di Jandoret, Sektor di Kultura & Deporte ta hasi un yamada un bes mas pa e organisashonnan akí bin registrá pa den deliberashon i bon komunikashon yega na solushonnan na bienestar di deporte den e bario di Jandoret.

MAS NOTISIA

Ministerio konserní: Enseñansa, Siensia, Kultura & Deporte