Publiká riba 26 Aprel 2022
Durante kombersashon informal ku Minister di Hustisia mr. Shalten Hato
WILLEMSTAD- Minister di Hustisia mr. Shalten Hato durante su bishita na Sürnam, a hiba kombersashon ku Presidente di Sürnam, sr. Santhoki, na kende el a ekstendé un saludo fraternal na nòmber di Promé Minister di Kòrsou sr. Gilmar Pisas, alabes ekstendiendo un invitashon na dje pa próksimamente bishitá nos pais.
Presidente Santhoki na e okashon akí a ekstendé su sinsero deseo pa komo pais kontinuá ku e relashon di trabou kual tabatin entre e paisnan anteriormente, i asta hisa esaki na e nivel di mas haltu. Den pasado tabata eksistí un akuerdo di koperashon entre Sürnam i e islanan di Antias Ulandes.
Presidente Santhoki a mustra riba e desishon pa biaha sin visa pa Sürnam ku lo drenta na vigor entrante 1 di mei 2022, lokual lo hasi biahamentu di siudadanonan di Reino Hulandes, Bélgika i Fransia mas fásil.
Tambe Presidente Santhoki a ekspresá e interes pa riba korto plaso papia ku Promé Minister Pisas. Den e kuadro akí el a ekspresá e disponibilidat pa yega na akuerdonan ku Kòrsou.
Finalmente Presidente Santhoki a ekspresá su deseo ferviente pa próksimamente mira Kòrsou, Aruba i Sint Maarten bira miembro asosiá di CARICOM.