Publiká riba 24 Ougùstùs 2020
Willemstad – Servisio di Tráfiko i Transporte (UOVV) ta duna espasio na e klientenan ku no por a kùr nan vehíkulo dianan tras di lomba pa hasi esaki e siman aki. Mester tene kuenta ku distansia sosial i reglanan di higiena, mirando e situashon rondó di COVID-19.
Manera ta konosí un kantidat di outomobilista a keda desepshoná ya pa 2 siman na momentu ku nan no por a kùr nan vehíkulo na Keuringslokaal. Motibu di esaki tabata
pasombra e kùrmesternan a akudí na reunionnan konvoká pa nan sindikato. UOVV di inmediato a traha riba un plan pa akapará e personanan ku no por a kùr nan vehíkulo siman pasa. UOVV ta rekobrá e retraso den e siguiente skema:
| Tabata tin sita dia: | Por bin kùr dia: |
| 12 i 13 ougùstùs | djarason 26 ougùstùs entre 8or i 12or di mèrdia |
| 14 i 17 ougùstùs | djarason 26 ougùstùs entre 2 or pa 4or di mèrdia |
| 17 i 18 ougùstùs | djaweps 27 ougùstùs entre 8or i 12or di mèrdia |
| 19 i 20 di ougùstùs | djaweps 27 ougùstùs entre 2 or pa 4or di mèrdia |
| 21 di ougùstùs | djabièrnè 28 ougùstùs |
Tur persona ku tin sita e siman aki, por pasa kùr nan vehíkulo segun e orario i fecha di nan sita. Tur sobra personanan, ku no tin sita ainda, mester traha un sita nobo via di Bentana di Informashon na email sita@gobiernu.cw. Lo no por atendé esnan ku ta yega na Keuringslokaal sin sita. Nos ta lamentá i pidi diskulpa pa e inkombeniensha ku e situashon aki ta trese kuné.
UOVV ta pidi tur persona pa kumpli ku e fecha nan aki i tene nan mes na e medidanan di higiena stipulá. Banda di esaki UOVV ta pidi kooperashon pa tur hende tene nan mes na e medidanan di higiena stipulá mirando e situashon di COVID na Kòrsou. Ban kuidá nos mes i otronan. UOVV ta rekordá tur persona ku UOVV no por aseptá kèsh ni tampoko pago via di ‘online banking’. Por swipe ku karchi maestro.
