Publiká riba 16 Febrüari 2023
WILLEMSTAD – Den e periodo benidero Kòrsou por bai mira desaroyonan nobo pa ku e forma ku Gobièrnu ta komuniká. Pa medio di Direktorado di Komunikashon i Informashon (C&V), Gobièrnu di Kòrsou ta bai lansa diferente produkto nobo. E Direktorado enkargá ku komunikashon di entre otro Konseho di Minister, a bin ta desaroyá i implementá varios strategia i medionan di komunikashon inovativo i moderno pa mehorá e forma di informá komunidat. Komo parti di e plan di Gabinete Pisas pa yega na un mihó komunikashon i informashon, ta bai drenta awor un siguiente fase pa sigui alsa e nivel di komuniká i informá.
Un di e aspektonan nobo, aparte di Komunikashon ku ta kana pa medio di komunikado òf konferensha di Prensa, ta ku C&V pa promé biaha den e último 30 añanan ta bai lanta e ala di Informashon Gubernamental. Esaki pa medio di e plataforma multimedial ku yama “Gob.” (pronunsiá komo Gob punto). “Gob.” ta un plataforma multimedial ku tin diferente informashon gubernamental ku ta keda duná pa medio di diferente programa. E plataforma akí por bin haña bèk riba website i medionan sosial di Gobièrnu, pero tambe lo bai ta aksesibel via e diferente servisionan públiko (ofisinanan) di Gobièrnu i un portal interno dediká na empleadonan públiko. Ademas lo bai transmití via televishonnan komersial i Flow tambe (antes konosí komo kanal 84).
Algun di e programanan i segmentonan di Gob. ta “Gobièrnu na Plaka chikí” ku ta enfoká riba maneho di Gobièrnu, “Ki bo ke men” ku ta un Podcast dirigí riba temanan di aktualidat i tambe “Bon pa Sa” ku ta enfoká riba sifra i echonan gubernamental, servisionan ku Gobièrnu ta duna, historia di Kòrsou, dianan nashonal i e prosesonan di akshonnan ku ta keda reglá den Gobièrnu. Adishonalmente tin e programa “Mi T’Ámtenar” ku ta bai pone empleadonan públiko i nan trabou den lus di dia pa asina krea un mihó imágen tokante ken e ámtenar ta i ki nan trabou ta enserá. Finalmente, lo tin tambe “Puntra Fòrti 17”, kua nòmber ta reflehá e adrès di ofisina di Promé Minister ku na su turno ta bai kontestá preguntanan di komunidat.
Un otro kambio ku na fin di 2022 ya kaba a kuminsá bira visibel ta e imágen i diseñonan nobo di Gobièrnu. Ta bai hasi mas uso di ilustrashonnan moderno – kombinando imágen i teksto – pa por komuniká di forma mas efektivo. Pa hasi esaki posibel a invertí den un banko di potrèt lokal ku mas ku 10.000 imágen aden ku yama “GovStock”. E banko di potrèt akí ta pa uso interno.
Pa loke ta trata komunikashon interno, Direktorado di Komunikashon i Informashon ta bai lansa huntu ku e Departamento di Rekurso Humano un portal interno kaminda ta bai enfoká den duna e empleado públiko tur informashon ku nan ta deseá. Informashon manera notisianan relevante ku tin efekto riba nan trabou òf p.e. informashon general riba temanan di posishon hurídiko. Alabes a traha na un ‘Opleidingsplan’ pa tur eksperto di komunikashon, ku tambe ta bai keda ehekutá pa asina alsa nivel di komunikashon di Gobièrnu aun mas tantu.
Pa mas informashon por bishitá www.gobiernu.cw òf subi riba e páginanan sosial di Gobièrnu di Kòrsou.
____________________
Pa mas informashon, prensa por tuma kontakto ku Direktor di Komunikashon, sr. Maharo Isenia.
