Publiká riba 15 Desèmber 2019
WILLEMSTAD- Minister di Desaroyo Ekonómiko, sra. Giselle Mc William resientemente a dirigí su mes na 164 pais durante di reunion di ‘General Council’ na World Trade Organization (WTO). Esaki den un disertashon demostrando Kòrsou su interes pa atkerí miembresia independiente den e organisashon di WTO. Minister Mc William su disertashon lo tabata promé bes den historia di Kòrsou ku un mandatario lokal a papia den WTO.
Gobièrnu di Kòrsou a manda un aplikashon formal pa bira miembro di World Trade Organisation (WTO). En prinsipio Kòrsou ya ta miembro di e organisashon multilateral aki for di 1949, a traves di Reino Hulandes, pero den e kaso aki e petishon di Gobièrnu ta, pa nos pasa pa bira miembro independiente den e organisashon di WTO.
World Trade Organisation ta e organisashon mundial ku ta regulá reglanan di komersio internashonal. Miembresia na WTO lo brinda nos, entre otro benefishinan, e pasaporte pa por realisá akuerdonan komersial ku otro paisnan, spesialmente esnan den nos region, na benefisio di nos pueblo. Na mundu tin poko organisashon multilateral manera WTO, ku poder pa influensia komersio. Ounke e organisashon ta pasando den retonan difísil, e echo ku Kòrsou a ekspresá su interes pa bira miembro, siendo un isla chikitu i vulnerabel den Karibe, ta di balor stratégiko i importante pa e organisashon.
Durante di su disertashon den e ‘General Council’, Minister Mc William a indiká na e paisnan presente ku Kòrsou, komo un isla chikí den desaroyo manera St. Lucia, Repúblika Dominikana i Barbados den nos region, ta sigui dal e pasonan nesesario pa realisá su ambishon pa integrá ekonómikamente mas tantu posibel den nos region. Realisashon di e miembresia aki lo sòru pa oumentá nos eksportashon, kual ta un paso sumamente importante den kresementu di nos ekonomia. Minister Mc William a indiká tambe ku, apesar ku Kòrsou ta chikí i ku geográfikamente nos ta ubiká leu for di Oropa, nos mester tin e hèrmèntnan pa por defendé nos interesnan di mes manera ku e partnernan den reino situá den Oropa. Union Oropeo ta atendé interesnan di Hulanda den WTO na e momentunan aki pero mirando ku Kòrsou no ta forma parti di Union Oropeo hopi bia nos interesnan ta distinto, esaki Minister Mc William a duna di konosé. E integrashon ekonómiko di Kòrsou den desaroyonan den region lo ta solamente posibel siendo miembro di WTO ya ku reglanan di komersio internashonal ta keda atendé den e plataforma aki, i tur pais ku ta den nos region ta aktua i negoshá segun e reglanan di WTO. Den e kuadro aki negosiashonnan ta andando ku Colombia i Repúblika Dominikana miéntras tambe nos ta den konsulta ku Trinidad & Tobago.
Kòrsou su ekspreshon di interes pa bira miembro independiente di WTO ta mustra e relevansia ku un organisashon asina tin pa mundu. WTO ta rekonosé solamente dos tipo di kondishon pa un pais ta miembro: paisnan ku ta kompletamente independiente i paisnan ku tin un teritorio aduanal separá. Den e kuadro aki Kòrsou su akseso komo miembro independiente di WTO ta úniko pasobra ta pa promé bia den historia di WTO ku un pais ta hasi petishon komo un teritorio aduanal separá.
Akseso na WTO ta nifiká tambe ku nos lo tin ku pone nos kushina na òrdu. Nos reglanan di komersio, nos manehonan, nos leinan, kontrol riba kalidat, transparensia di informashon, krea un merkado kompetitivo pa nos empresanan i invershonistanan, i tambe mehorá nos servisio ta algun di e benefishinan ku un akseso na WTO ta enserá. WTO ta duna apoyo tékniko na gobièrnu di paisnan ku apliká pa bira miembro. Den e kuadro aki tambe MEO a entamá un proseso pa yega na un National Export Strategy (NES) ku sosten di International Trade Center (un supsidiario di WTO i Nashonnan Uní) pa yuda prepará nos pais pa drenta e arena di komersio internashonal ku ta eksigí pa tur pais partisipante ta kumpli ku reglanan i kondishonnan di komersio pa produkto i servisionan. Eskportashon ta nesesario pa pusha e ekonomia di Kòrsou pa bai dilanti i e NES ta e vehíkulo pa yuda logra esaki.
Durante di e reunion di 9 di desèmber último na Geneva Union Europeo a pidi mas tempu pa studia nos petishon i Estádos Unídos a pidi algun detaye pa nan por formulá nan sosten mihó. Trinidad & Tobago i Uruguay di manera kla, a duna nan sosten na Kòrsou den nos aplikashon pa bira miembro di WTO. Delegashon di Kòrsou na WTO a gradisí e paisnan aki inmensamente pa nan sosten. Despues di e reunion mes ora e delegashon di Kòrsou a tuma kontakto ku e konseheronan di USA i EU pa trata i aklará nan puntonan di interes pa ku e aplikashon di Kòrsou. Pa febrüari 2020 tur konsulta ku paisnan di interes mester ta kla pa e aplikashon di Kòrsou pa bira miembro independiente WTO keda tratá komo punto di agènda i aseptá den e reunion di General Council di WTO ku lo tuma lugá den mart 2020.
