Notisia

Djamars 1 di sèptèmber 2020

Distinguido pueblo di Kòrsou,

Mi ta konsiderá esaki un momentu importante pa mi kompartí algun pensamentu ku boso i asina duna mas transparensia pa ku e proseso pa yega na un akuerdo ku Hulanda pa ku sosten finansiero.

Manera a ser anunsiá, Kòrsou lo risibí bishita di trabou di Sekretario di Estado, señor Knops, dia 2 i 3 di sèptèmber. Durante su bishita el lo tin kombersashon entre otro ku nos Gobernador, señora Lucille George-Wout, mi mes persona, pero tambe lo tin enkuentro ku entre otro algun partnernan sosial.

Ku nos pais ta den un situashon prekario i ku nos retonan sosial ekonómiko ta grandi, ta un realidat. Riba esaki ta bin aserka ku nos ta eksperensiá kresementu di kasonan di kontagio lokal di COVID-19, loke por tin su reperkushon sosial-ekonómiko.

No opstante e situashon difísil aki, Kòrsou te ku awor a logra mantené un gran kantidat di kupo di trabou, sostené empresarionan individual i duna alivio dor di por ehèmpel duna karchi sosial na esnan ku mas nesesidat den nos komunidat. Nos no a hasié nos so; Hulanda a sostené nos den esaki i nos ta agradesido.

Ta di vital importansia pa nos komunidat superá e retonan ku nos lo konfrontá den e periodo ku ta bin i ku Gobièrnu por sigui duna e sosten nesesario na nos pueblo. Mientrastantu ku nos ta traha pa bolbe start nos ekonomia, rebibá nos sektor di turismo, ‘jump start’ proyektonan ku ta trese mas aktividat ekonómiko i krea kuponan di trabou, nos mester di sosten finansiero urgente.

Ta un bèrdat ku esaki nos no por hasié nos so i mester di yudansa. Manera ta konosí, Hulanda a ofresé pa yuda bou di algun kondishon.

Un di e kondishonnan aki ta institushon di un Caribische  Hervormingsentiteit (CHE) pa medio di e Lei di konsenso i tambe ehekushon di e asina yamá ‘landspakket’ ku ta kontené reformanan struktural.

Banda di esaki nos mester raportá promé di sèptèmber te kon leu nos a kumpli ku e kondishonnan mará na e di dos transh.

Pa ku e kondishonnan mará na kontinuashon di sosten finansiero, ta bon pa mi trese dilanti ku tin kombersashonnan andando entre Kòrsou i Hulanda pa ku kontenido den Lei di konsenso ku ta konserní e instituto i e ‘landspakket’.

Spesífikamente pa ku ‘Landspakket’ Kòrsou, no tin masha opheshon pa ku e proposishonnan. Todo lo kontrario, e ‘landspakket’ ta reflehá den liña grandi loke Kòrsou mes a proponé den su Strategia di Kresementu i seguidamente den e programa di reforma (hervormingsprogramma).

Nos ta den kombersashon ku Hulanda aworakí tokante di e entidat, spesialmente tokante kon e proposishon di lei ta pas den nos leinan i e outoridat (‘bevoegdheden’) di e entidat di reforma aki.

Nos ke hasi uso di e bishita di Sekretario di Estado pa netamente huntu yega na un resolushon pa e puntonan ku pa nan ta importante – pero tambe pa nos – pa nos dal e siguiente paso i sigurá e finansiamentu urgente ku nos mester pa atendé ku e situashon di krísis kousá pa e pandemia global COVID-19.

Mi ta boga aún mas pa lokual semper mi ta bisa, ta HUNTU nos tin ku yega na e solushon. Sigur na e momentunan aki mi ta kere ku Kòrsou i Hulanda mester por haña manera pa traha huntu, na bienestar di nos pueblo.

Mi ta konvensí ku Sekretario di Estado Knops ta kompartí e pensamentu aki!

Mi lo sigui informá boso tokante resultado di e kombersashonnan.

Eugene Rhuggenaath

Minister Presidènt di Kòrsou