Publiká riba 13 Òktober 2020
WILLEMSTAD- Djamars 13 di òktober, alrededor di 13:15 or, personanan indokumentá será na Barak di ilegal tabata grita ku e lugá ta na kandela i pa habri pa nan sali.
Mesora e personal ku ta traha den e área akí a habri e portanan i a transportá esnan indokumentá pa otro área kaminda nan tabata for di peliger di e kandela. Ta trata aki di un grupo di 17 persona indokumentá.
Tanten ku e personal tabata den akshon, nan a tuma nota ku nuebe persona indokumentá a kibra e wayanan di kurá i pasa den e burakunan. E personal a logra detené shete persona di e grupo akí. Dos di nan a bula dos hèki i kore den direkshon di e mondi banda di Landfill.
Personal di prizòn huntu ku miembronan di Kuerpo Polisial, durante di un búskeda intensivo den e área, ku ayudo di helikòpter di Wardakosta, a bin logra detené e dos otronan rápidamente na altura di saliña na Janthiel. Durante di e intento di huida akí un persona indokumentá a frakturá su mes, i unu a inhalá hopi huma. Médiko di prizòn a atendé nan na Sentro Médiko di Prizòn.
Personal di SDKK mes a paga e kandela.
Gerensia di SDKK, huntu ku departamento di mantenshon i dòkter di polis, a inspekshoná e sitio pa saka afó si por hasi uso di e Barak pa sera e personanan indokumentá aden. Despues di hasi un limpiesa profundo a realoká e personanan en kuestion na e sitio. Durante di e inspekshon den otro barak a konstatá vários destrukshon kometé, entre otro destrukshon di kámara di seguridat, pòchi di w.c. i tambe pipa i kranchi di awa.
Investigashon riba e kasonan akí ta kontinuá.
