Publiká riba 16 Aprel 2020
WILLEMSTAD – Un di e eventonan grandi ku no por sigui pa motibu di COVID-19, ta Dia di Rei. Minister di Desaroyo Ekonómiko, sra. Giselle Mc William, den konkordansia ku tim di krísis, a yega na e desishon pa kanselá tur aktividat den kuadro di Dia di Rei 2020. No ta posibel pa den un evento asina, hende tene nan mes na reglanan di distansha sosial. Lokèt di Pèrmit lo tuma kontakto, na su debido tempu, ku kada organisadó di eventonan di Dia di Rei pa asina por regla restitushon di ‘leges’ ku ya a paga kaba.
Tur aña riba Dia di Rei (27 aprel), nos sentro di siudat ta un di e sitionan di mas prominente, kaminda selebrashonnan sa tuma lugá pa medio di aktividatnan di marshe di pruga, eventonan festivo i hopi mas. Aparte di nos sentro di siudat, tin diferente otro bario na Kòrsou, ku normalmente tin aktividatnan riba e dia aki. E dia ta sòru pa entrada èkstra pa basta hende ku tin mester di dje. E desishon pa para Dia di Rei no tabata unu fásil pa tuma, sinembargo salubridat i bienestar di nos pueblo ta Gobièrnu su promé prioridat meimei di e retonan aki.
