Publiká riba 07 Yüli 2021
WILLEMSTAD – Dia 10 di yüli 2021 Asuntunan Públiko konosí komo Kranshi konhuntamente ku Servisio di Trafikó i Transporte, ta organisá elekshon pa eligí representantenan di doñonan di pèrmit di Taksi konforme artíkulo 5 di AB 1969 no 51.
Aña pasá elekshon pa komishon di Taksi no a tuma lugá simultaneamente ku e elekshon di Bùs i Toerwagens. Konforme lei, kada tres aña ta eligí representantenan di personanan ku pèrmit di bùs chikí i mediano, Taksi i Toerwagens.
Djasabra awor, 10 di yüli, e elekshon di komishon di Taksi ta tuma lugá na Servisio di Trafikó i Transporte, Parera z/n. Den e kuadro akí 10 persona a postulá nan mes. Tur kandidato mester kumpli ku e rekisitonan nesesario pa por ta eligibel.
Riba djárason 7 di yüli, 2’or di mèrdia, a tuma lugá na Kranshi un reunion ku e komishon di elekshon, pa determiná e komposishon di e lista di kandidato pa e komishon di Taksi. Esaki a tuma lugá pa medio di lòt. Lista di kandidato ta konsistí di e siguiente nòmbernan konforme e sekuensha menshoná aki:
Kranshi ta informá na tur posedor di un pèrmit di Taksi bálido pa hasi uso di nan derechi pa vota, pa asina yega na e komishon ku ta bai representá nan pa e periodo preskribí konforme lei. Ta rekordá tambe ku mester hasi uso di tapaboka i bin ku nan pèrmit i sédula òf reibeweis bálido.
