Notisia

WILLEMSTAD – Despues ku Gobièrnu a hasi un revishon di e aktual areglonan pa Sosten Empresarial, a yega na e desishon konhunto pa kontinuá tantu ku e Supsidio pa Salario (NOW) komo e Sosten pa Empresario Individual (TBZO). Na e momentunan akí, Gobièrnu a risibí e sobrá parti di e di seis transh (terser kuartal di 2021) pa por habri e aplikashonnan di tantu NOW komo TBZO pa luna di yüli te ku sèptèmber 2021 ku forsa retroaktivo. E aplikashon pa Sosten den Gastunan Operashonal (TVL), lamentablemente lo no bai habri mas. 

Tantu e aplikashon komo e pago di NOW i TBZO di yüli pa sèptèmber 2021, ta planiá pa tuma lugá den luna di sèptèmber benidero. Realidat ta ku te ainda tin empresanan ku ta pendiente pa risibí pago di e sosten pa Supsidio di Salario (NOW) pa luna di mei 2021. Manera ya ta konosí, esaki a stanka debí na e limitashon di fondonan di likides ku Gobièrnu tin disponibel i kontrolnan ku ainda tin ku ser hasí. Pagonan ku ainda ta pendiente pa luna di mei 2021, tambe lo paga na  luna di sèptèmber. Pa loke ta trata luna di yüni 2021, lamentablemente lo no bai habri aplikashon pa NOW i TBZO mas ya ku no a sobra fondonan disponibel pa e periodo akí.

E kambionan prinsipal ku lo introdusí pa ku e areglo di TBZO, ta ku e montante máksimo ku por risibí ta bira 1.000 florin en bes di 1.335 pa luna, mester entregá “bankafschrift” kompletu pa por hasi chekeo di entrada i huntu ku esaki mester entregá tambe awor e Deklarashon di Impuesto riba Entrada (“inkomstenbelasting”) di aña 2020 i Impuesto riba Ganashi (“winstbelasting”) di aña 2019, dependé e tipo di empresa. Adishonalmente e empresarionan selektá mester partisipá obligatoriamente na training i coaching via di e plataforma di MiNegoshi.

E kambionan prinsipal pa e areglo di NOW ta enserá entre otro:

• Promedio riba e pèrdida di entrada di 25% mínimo lo bai konta awor pa un periodo di 3 luna en bes di mensual;
• Huntu ku esaki e pago di supsidio tambe lo bira te ku un máksimo di 80% pèrdida di entrada en bes di 100%;
• E eksigensia pa ku entrega di 20% di parti di e trahadó lo no ta nesesario mas;
• E pago mensual di e supsidio den forma di ‘voorschot’ lo ta te ku 75%, pasó sobrá 25% lo mester paga despues di e kontrol;
• Personanan ku kontrato di 0 ora (oproepkrachten) lo no por risibí supsidio mas.

Pa e areglo di NOW lo bai pidi mas dokumento adishonal pa ku e proseso di kontrol, manera entre otro kuentanan anual di 2019 i 2020, impuesto di entrada i impuesto di ganashi di aña 2019 i 2020, ‘verzamelloonstaat’ di 2019 i 2020, etc.

Gobièrnu di Kòrsou ta mas ku nunka konsiente di e situashon sosial-ekonómiko di nos pais i p’esei ta sigui hasi lo máksimo pa keda salbaguardiá kuponan di trabou, pero tambe redusí e kontrakshon ekonómiko di nos pais dor di sostené nos empresarionan i e forsa di kompra di nan empleadonan.

MAS NOTISIA

Ministerio konserní: Desaroyo Ekonómiko