Notisia

WILLEMSTAD- Resientemente EU Desk Kòrsou a tene un ‘roadshow’ eksitoso bou di e diferente ministerionan gubernamental, pa informá tokante aksesibilidat di fondonan Oropeo. E ‘roadshow’ akí a tuma lugá dianan 2 te ku 15 di mart último i ta un di e diferente aktividatnan ku EU Desk Kòrsou ta desplegá pa oumentá kapasidat lokal i oumentá uso di e fondonan disponibel.

E ‘roadshow’ di EU Desk Kòrsou serka e diferente ministerionan gubernamental, tabatin komo meta prinsipal pa ampliamente distribuí informashon tokante fondonan Oropeo i subi konosementu kon pa apliká i manehá proyektonan ku keda finansiá ku e fondonan akí. Alabes, durante e ‘roadshow’ a interkambiá informashon ku e partisipantenan i a splika tokante tur e posibilidatnan ku e fondonan akí ta brinda.

E ministerionan a risibí informashon detayá ku por ta relevante spesífikamente pa e ministerio en kuestion i su stakeholdernan. Tur e diferente ministerionan ku a partisipá a reakshoná sumamente positivo i a palabrá di enkargá un òf mas kolega komo persona di kontakto den kuadro di EU Desk Kòrsou. E kolaborashon ku e diferente ministerionan lo kontribuí na mihó desaroyo di ekspertisio i ta yuda krea mas konosementu i kapasidat lokalmente. Sigur den tempu di skarsedat, esaki por yuda komplementá presupuesto di e ministerionan gubernamental.

Ademas di sra. Vanessa Toré ku ta Hefe di Sektor di Koperashon Ekonómiko Internashonal di MEO i alabes Hefe di EU Desk Kòrsou, e delegashon ku a bishitá e diferente ministerionan a konta ku presensia di Minister Plenipotensiario Suplente na Hulanda, sra. Eunice Eisden komo embahador di EU Desk Kòrsou.

Aparte di e ‘roadshow’ akí, EU Desk Kòrsou a bin ta organisá diferente otro seshon di informashon, entrenamentu i presentashon na instansia i personanan interesá. EU Desk Kòrsou ta konsiderá di sumo importansia pa distribuí informashon relevante i transparente mas tantu posibel na komunidat den su totalidat i asina alsa konsientisashon.

EU Desk Kòrsou a keda instituí na aña 2018 bou di e Sektor di Koperashon Ekonómiko Internashonal di Ministerio di Desaroyo Ekonómiko (MEO). Institushon di EU Desk Kòrsou a tuma lugá di moda ku Kòrsou por yega na hasi mihó uso di e programa- i fondonan di supsidio Oropeo ku no ta kai bou di e fondonan Oropeo di desaroyo, lokual nan ta yama European Development Funds (EDF). E non-EDF ta konsistí di un seri di programa sumamente interesante ku lástimamente Kòrsou no tabata hasi hopi uso di dje. Meta di EU Desk ta pa konsientisá komunidat di nan eksistensia i logra ku mas organisashon ta bai hasi uso di nan.

EU Desk Kòrsou ku ta tambe e sentro nashonal di kontakto (NCP), ta identifiká posibel fondonan ku Kòrsou por bin na remarke p’e. Fondonan Oropeo ta ofresé vários oportunidat pa organisashonnan lokal risibí supsidio. E proseso di aplikashon por ta kompliká i petishonnan sa keda rechasá pa falta di konosementu. P’esei ta importante subi e konosementu i kapasitá mas tantu hende posibel riba e tereno akí.

Huntu ku sra. Vanessa Toré i sra. Eunice Eisden, e delegashon di EU Desk Kòrsou a konsistí di sr. Richard Cardoze i sra. Margit de Freitas ku ta konseheronan di EU Desk Kòrsou i sra. Yanina Urbaez-Urbaez ku ta enkargá ku kordinashon di e unidat.

EU Desk Kòrsou lo sigui tene seshon di entrenamentu pa esnan interesá por siña mas tokante kon ta apliká. EU Desk Curaçao ta enkurashá tur organisashon ku ta aktivo den áreanan kultural, edukativo pero tambe empresarial pa tuma kontakto ku e desk pa kualke informashon adishonal. Por bishitá e facebook page di EU Desk Kòrsou na @eudeskcuracao.