Responsabilidat mutuo mester yuda evitá pa Elekshon 2021 bira fuente di kontagio
Publiká riba 12 Mart 2021
Willemstad – Konseho Supremo Elektoral (KSE), huntu ku e diferente partidonan polítiko i tambe Tim di Krísis di Kòrsou, a yega na palabrashonnan konkreto di moda ku Elekshon 2021 por tuma lugá mas ‘Covid-proof’ posibel. Di e forma akí, tur e gruponan envolví ta duna nan máksimo pa yuda evitá ku e dia tan sagrado pa futuro di nos pais por bira un evento kaminda COVID-19 ta plama den nos komunidat. E nesesidat pa esaki a bira asta mas urgente konsiderando e echo ku tin diferente mutashon di e vírùs na Kòrsou i e sifranan di kontagio ta subiendo rápidamente.
Durante di un reunion di KSE, tim di krísis i partidonan polítiko, a yega na e siguiente palabrashonnan pa evitá aglomerashon i pa sòru ku hende ta tene distansia di otro na e urna:
- Pa evitá ku muchu hende ta bai vota na mesun momento, KSE a habri mas urna e biaha aki, i tambe a maksimalisá e kantidat di votadónan na kada urna.
- Ta pidi públiko spesífikamente pa vota mas tantu durante dia i no warda te atardi lat, manera pa hopi hende ta kustumber. Ta konsiderá ainda si lo bini ku un sistema pa purba laga grupo di hende vota na sierto ora. Pero esaki lo ta un petishon, pasobra ta realisá ku hende tin libertat pa bai vota ora mas ta kumbiní nan. Realidat si ta, ku si por repartí bishita na urnanan durante henter e dia di vota, ta krea ménos aglomerashon, i ku esei ta baha e riesgo pa kontaminashon masal durante elekshon.
- Partidonan lo no pone hende na entrada di urna pa repartí foyeto i informashon na votadónan. Enkambio, e partidonan por opta pa pega poster pafó di urnanan.
- Partidonan lo no pone opservadónan na entrada, ni paden, di e lokal di vota. Dos opservadó pa kada urna por ta presente solamente na momentu ku urna habri 8 or. Despues nan tin di bandoná urna i por ta bèk ora urna sera 7 or di anochi pa por opservá e konteo di voto. Mester entregá nòmber di e opservadónan adelantá na KSE, pa asina por pidi eksonerashon pa nan por bai kas ora toke de keda ta drenta na vigor 10’or di anochi.
- Ora tin votashon di lidernan di partido, lo no hasi esaki den grupo, manera sa ta nos kustumber. E lider por presentá na urna solamente huntu ku maksimal 3 persona.
- Partidonan lo no trafiká nan miembronan, fanátikonan i sigur nos grandinan komo grupo den konvoi òf otro vehíkulo, kaminda hende mester sinta pèrtá riba otro.
- KSE a organisá e repartishon di votadónan na e urnanan na un manera balansá i a maksimalisá e kantidat di persona ku por presentá na kada urna.
- KSE a prepará tur urna ku e medidanan nesesario pa por garantisá un bon fluho (doorstroom) di hende, pa evitá aglomerashon i mantené e reglanan di distansia i higiena. Tin ‘crowd managers’ i miembronan di seguridat na e urnanan pa por manehá esaki. Pafó di e urna kuerpo polisial tin e responsabilidat pa mantenshon di órden públiko.
- Ora KSE òf outoridatnan konstatá ku individualnan òf gruponan di kualke partido no ta tene nan mes na e palabrashonnan, ta tuma kontakto promé ku e lider di e partido. Si esaki no ta òf no por kontrolá e situashon, polis lo aktua mesora.
Tambe a yega na palabrashonnan tokante e aktividatnan polítiko durante kampaña i na final di dia di elekshon. A palabrá ku promé ku elekshon i despues di votashon:
- Partidonan polítiko lo yuda evitá ku tin aglomerashon na sede di i na kas di kandidatonan, òf durante otro aktividat den kuadro di kampaña òf na final di dia di elekshon. Kantidat di persona presente mester ta kuadra ku e reglanan vigente. Aktualmente, esaki ta un máksimo di 50 persona, pero e kantidat akí por kambia debí na e oumento resien di kasonan positivo. Tur evento mester di un pèrmit promé.
- Ta evitá di pone muzik duru na e sedenan, pa asina hende no mester grita duru den orea di otro, loke ta kousa peliger di kontagio ku e vírùs, i por atraé mas hende na e sitio di e sede.
- Partidonan lo splika nan miembro i fanátikonan ku tur hende mester tene sufisiente distansia di otro, i bisti tapaboka na tur momento ku e ta den besindario di otro. Ora un persona tin síntomanan di COVID-19 lo deskurashá pa e persona akí sali fo’i kas i bai vota. Mihó eskoho ta, pa hende ku ta den karentena i sigur den isolashon ora nan a tèst positivo pa COVID-19 keda kas. Pero lei ta duna oportunidat na tur hende pa hasi uso di nan derecho di vota, pues lo no prohibí hende pa bai vota, mas bien ta urgi pa tuma tur prekoushon posibel pa evitá di kontaminá otro hende.
