Publiká riba 11 Mei 2023
Willemstad – Minister Charles Cooper huntu ku Servisio pa Obra Públiko (OW) ta informá ku entrante djasabra 13 di mei lo habri e krusada Kaya W.F.G. Mensing/Kaminda Andre J.E. Kusters den área di Zeelandia bèk. OW a hasi diferente adaptashon den e situashon di tráfiko pa alsa seguridat di tráfiko.
E kambionan ku ta bai tin ta:
● Tin un drèmpel riba Kaya W.F.G Mensing. Esaki lo ta nèt enfrente di Kooyman Zeelandia i Candy Barrel,
● Tráfiko ku ta bini di Kaminda Andre J.E. Kusters, pues biniendo di Van Den Tweel Supermarket bayendo direkshon di e krusada Kaminda Andre J.E. Kuster/Kaya W.F.G Mensing, ta obligá pa bai na man drechi. No lo por lora mas na man robes pa bai den direkshon di Kooyman,
● Vehíkulonan di karga ku ta riba Kaya W.F.G Mensing pa baha e serito i pasa dilanti di Kooyman, mester sigi stret. Ta prohibí pa vehíkulo di karga lora na man robes drenta Kaminda Andre J. E. Kusters,
● Vehíkulonan di karga ku ta bini for di Kaminda Andre J.E Kuster, pues biniendo for di Van Den Tweel Supermarket ta obligá pa lora na man drechi na e krusada Kaminda Andre J.E. Kuster/ Castorweg, i drenta Castorweg. Esaki ta e hanchi di Home Plus. Ta prohibí pa vehíkulo di karga sigui bai stret,
● Vehíkulonan di karga ku ta bini di Castorweg ora yega na e krusada Kaminda Andre J. E. Kuster/Castorweg ta obligá pa lora na man robes i bai direkshon di Van Den Tweel.
Lo tin bòrchinan di kaya ku ta ilustrá e kambionan menshoná. Ta hasi un apelashon na tur outomobilista pa tene kuenta ku e kambionan aki.
