Publiká riba 02 Mei 2020
WILLEMSTAD – Su Mahestat Rei Willem-Alexander a otorgá stewardess señora Margareth Abraham póstumamente, Medaya di Honor di Plata pa Yudansa Humanitario.
E Medaya di Honor di Plata pa Yudansa Humanitario, ta despues di e Órden Militar ‘Willems-Orde’, e distinshon di kurashi Hulandes mas bieu te ainda eksistente. Ta otorgá e distinshon akí na personanan ku a hasi un akto humanitario ku tin e karakterístikanan di kurashi, diligensia i sakrifisio propio.
Dia 2 di mei 2020 nos ta konmemorá e echo ku 50 aña pasá e stewardess señora Margareth Abraham a fayesé. Durante un aterisahe forsoso di ALM 980 riba laman den besindario di e isla St. Croix el a sakrifiká su propio bida pa salba mas pasahero di morto. Na e okashon ei el a tuma su responsabilidat komo stewardess, sin a duda niun momentu. Ku esaki el a demostrá kurashi i balentia. Un akto heroiko den historia ku nos no mester lubidá i pa kua Su Mahestat Rei a ekspresá su apresio otorgando e Medaya di Honor di Plata pa Yudansa Humanitario.
Di akuerdo ku e medidanan ku gobièrnu a deklará den kuadro di e lucha kontra Covid-19, a posponé te próksimo aviso, e seremonia kaminda Gobernador ta entregá e Medaya di Honor di Plata pa Yudansa Humanitario, na famia di señora M. Abraham, di felis memoria.
