Publiká riba 29 Novèmber 2019
WILLEMSTAD – Un total di 66 partisipante, di sektor privá i servisionan di gobièrnu, a risibí un sertifikado komo prueba ku nan por halsa seguridat ora ta trata un evento, kaminda tin un kantidat grandi di hende. Esaki despues ku nan a sigui un kurso den e lunanan di òktober i novèmber, organisá pa Direktorado di kontrol di riesgo i maneho (DRR) pa kalamidat. E kursistanan a risibi diferente aspekto di seguridat for di ekspertonan di MOJO Concerts (Hulanda), ‘The Security Company’, Brantwer Kòrsou i Kuerpo Polisial Kòrsou.
DRR pa e di tres aña konsekutivo, a organisá e kurso. E aña aki a duna atenshon tambe na Komunikashon durante un krisis ku por surgi durante un evento kaminda tin un aglomerashon grandi di hende. Ora tin hopi hende riba otro, por ehèmpel durante di un festival, e kandidat di hende mes por forma un potensial riesgo òf kalamidat. Durante e kurso a organisá un rekorido den Sentro Deportivo Kòrsou pa asina alsa e konsientisashon bou di kursistanan di kosnan ku mester regla durante un evento grandi.
E kursistanan a siña traha un plan di seguridat, nan a tuma nota di eksperienshanan i na kua manera a aktua, kon e aktornan di mundu privá i públiko por traha huntu mas mihó i kon pa komuniká na e manera adekuá ku otro òf ku públiko den un situashon normal i durante di un situashon di krísis. Hopi atenshon a bai tambe na medidanan preparativo ku por tuma i kua ta e mihó manera pa instruí un públiko grandi na un evento.
E kursistanan tabata di Fundashon Desaroyo Deportivo Kòrsou, Polis, Brántwer, Ministerio di Enseñansa, Siensia, Kultura i Deporte, Krus Kòrá Kòrsou i Aruba, Vrijwilligers Korps Curaçao, Operationele Beveiligingdienst, DRR, Titan Security, Curacao Tourism Board, Sterck Events, Ambulance dienst St. Maarten, Rampenbureau St. Eustatius, Securitas i Curacao Airport Partners. Tur a risibí nan sertifikado i awor ta mas mihó prepará pa kualke evento di magnitut grandi.
‘Download’ e potrètnan aki:
